أمك  ثم أمك  ثم أمك بقلم د. هدى عبده

يعنى إيه ؟؟

يعنى حضن أكيد يضمك

و انت مطمِّن إليه

أمك ..

يعنى حد يشيل فِ همك

من غير مانت تحس بيه

و انت ايه فِ الكون يهمك

غير وتد .. تسند عليه

و الحكاية مش أبوك

ولّا خالك .. ولّا عمك

لا دى حاجة غصب عنك

شئ مالِكش يَد فيه

و اوعى تغلط يوم و تسأل

طب حنانها مقابل إيه

لو طلبت عنيها .. تقبل

تديهالك

أمال إنت فاكراها إيه

حاجة سهلة ؟؟

لما تبقى الجنة منها

و اما ربك يحكى عنها

يبقا إيه

لما ربك يرزقك ..

علشان خاطرها

لما ابنك يرحمك

علشان راحمها

لما تفضل عايشة تدعى

طول حياتها

لما باب م الجنة يقفل

يوم مماتها

لسة برضو مُصِّر تسأل

الأمومة يعنى إيه !