أنا بقلم صفاءعلي سليمان  

أنا…(3)

بقلم صفاءعلي سليمان

 

انا الحزن فالعيون

انا باهتة من غير لون

انا الطيش والجنون

  الملل والسكون..

انا القضبان والسجان

وكل أسوار السجون.. 

انا صورة قديمة في برواز

او شرخ باين في الإزاز

انا أي شئ فاسد في الكون..

   ****

انا ذهب صيني مغشوش

او ضحكةضايعة مالوشوش

انا العدم.. 

فراغ..خيال..

هوا..الناس مابتشوفوش

انا خريطة مقطوعة

  بوصلة مكسورة

 فنارة مهجورة

انا شخص تاني ماعرفش..

 ***

انا جرح سايب أثار

انا صهد النهار

 شرارة نار

 بحر غدار

انا الهزيمة والإنكسار

انا النكسةبعد الإنتصار

انا بإختصار

  جرح ومرار..

  ****

 انا وقت ضايع

 مالوش اي لازمة..

انا عداد زمن بيمر

ويخلق مليون أزمة..

مجرد دخان في الهوا

طيف في الفضا

جرح مالوش دوا

نغمة نشاز وسط الغنا

انا بداية النهاية

 ونهاية كل اللي إبتدا..