إحنا بتوع الأتوبيس

79
مايسة إمام إبراهيم
—————————–
قالوا أهل زمان
إحنا بتوع الأتوبيس
لا لينا في السياسة
ولا نعرف التسيس
لا لينا. في المواكب
ولا لينا في المناصب
ولا فينا حد ملك
أو حتى حرم رمسيس
احنا اللي مش متشافين
جوه الشقوق عايشين
راضين كدا بحالنا
ليه انتوا مش راضين ؟!!
تيجوا نبدل حالنا
وقولوا لنا انتوا مين؟ !!
بس اوعوا تيجوا ساعتها
تقولوا دول الهكسوس
إحنا مجرد أسامي
حبه هاموش و طاير
عاوز أمن وحراسة
يهشه كدا هشه
ويرشه كام ألف رشه
بكام كبشه فلوس
دا إحنا بتوع الأتوبيس
********************
حنا اللي صوتنا راح
وودانكم مسدودين
ولا تكونش دي حيلة
عاملين مش سامعين
عاملين مش شايفين
كل النمل اللي منا
في حيطانكم مبدورين
وكل شق فيها
محشور. فيه بالملايين
عايشين ومش عايشين
شايفين. ومش طالين
نقطة من بحر خيركم
الفايض بالملايين
وبطون عمالة تشكي
من تخمة الملالين
وبطون عشاها يادوب
ياااادوب حبه ملاليم
مااحنا بتوع الاتوبيس
احنا اللي خلاص بقينا
أفراس نهر طيبة
اللي صوتها بيزعج
في الليل ملك أواريس
—————————–