إزاى تتوازن بين القلب والعقل من غير ما تبقى بارد أو قاسي

إزاى تتوازن بين القلب والعقل من غير ما تبقى بارد أو قاسي

كتبت/ د/شيماء صبحي 

الموضوع مش إنك تبطل تحب، ولا إنك تبقى جامد ومتعاملش الناس كويس، بس لازم تفهم إن التعامل بالقلب لوحده بيموت صاحبه ببطء.

المطلوب إنك توازن، يعنى تستخدم قلبك تحس، وعقلك تختار.

خد بالك إن

القلب بيشوف النوايا، بس العقل بيشوف الأفعال.

القلب ممكن يصدق الكلام، لكن العقل بيقرأ المواقف.

القلب دايمًا بيدفعك للمسامحة، لكن العقل بيقولك “خليك فاكر المرة الجاية.”

يعنى لما حد يوجعك، متقولش “أنا مش هعرف أكون زيه”، قول “أنا هعرف أتعلم من الوجع من غير ما أبقى زيه.”

ولما تحس إنك اتأذيت من كتر الطيبة، متقلبهاش قسوة، خليك حكيم.

لأن الحكمة هى المرحلة اللى بين الطيبة الزايدة والبرود.

التحليل النفسي:

الشخص اللى بيعرف يوازن بين قلبه وعقله بيبقى شخص ناضج عاطفياً.

ده شخص فهم إن المشاعر محتاجة إدارة، مش كبت.

وإنك لما تحط حدود مش معناها إنك بقيت أناني، بالعكس، ده معناه إنك بدأت تحترم نفسك.

فى العلاج النفسي بنشوف كتير ناس طيبة اتحولت لشخصيات منغلقة أو قاسية،

وده بيحصل لما الطيبة ما يكونش ليها وعي،

ولما القلب يفضل يعطي من غير ما العقل يراجع.

لكن الوعى بيخليك توقف وتقول:

“أنا أقدر أحب وأحترم من غير ما أسمح لحد يوجعني.”

نصايح بسيطة تساعدك توازن

1. اسأل نفسك دايمًا: “اللى بعمله ده بيصب في مصلحتى ولا بيستنزفنى؟”

2. متقدمش اهتمام للى مش بيقدّره.

3. لما تحس إنك بتوجع، ماتكمّنش الإحساس، اسمعه، بس متعيشش فيه.

4. افصل بين “العاطفة” و”الواجب”، مش كل حد بتحبه لازم تكمّل معاه.

5. لو لقيت نفسك بتبرر كتير، اعرف إنك بدأت تمشي ورا القلب أكتر من اللازم.

النهاية 

هتفضل طيب، بس هتبقى طيب بعقل.

هتفضل بتحس، بس مش هتغرق فى إحساسك.

وهتعرف إن أعظم حب تقدمه مش للناس،

لكن لنفسك لما توقفها عند حد التعب

وتقول: “كفاية، أنا كده كفاية.”