إزاي تقتلع وجعك بإيدك وتقوم من تاني؟

كتبت/ د/ شيماء صبحي 

الموضوع مش سهل، ومش أي حد يقدر يعمله، بس الحقيقة اللي لازم نواجهها إن مفيش حد هيشيل عنك وجعك غيرك. كل الناس ممكن تسمعك، تحتضنك، تواسيك، تقولك كلام يريحك شوية، لكن اللي هيعالجك بجد هو إنت.

الوجع النفسي مش مجرد دمعة ولا تنهيدة.. دا حاجة بتكسر جواك وبتخليك مش شايف طريقك. ولو فضلت مستني حد ينقذك، هتفضل واقف مكانك. الحل الحقيقي هو إنك تمسك وجعك من جذوره، وتواجهه من غير خوف.

 إزاي تقتلع وجعك بنفسك؟

1. اعترف بوجعك: متتجاهلوش ومتحاولش تضحك على نفسك. قول لنفسك: “آه أنا موجوع.. بس هتعافى”.

2. افضفض لنفسك: اكتب وجعك على ورق، أو اتكلم قدام المراية. ساعات الكلام لنفسك بيحررك من الحمل.

3. افصل شوية: ابعد عن اللي بيزود وجعك، سواء أشخاص، ذكريات، أو حتى أماكن.

4. خطوات صغيرة: ماتستناش تغير حياتك كلها في يوم. خطوة صغيرة كل يوم = فرق كبير بعد شهر.

5. كافئ نفسك: لو عدّيت يوم من غير دموع أو من غير تفكير مؤلم، كافئ نفسك بحاجة بسيطة بتحبها.

6. اتعلم من وجعك: متخليش التجربة تمر عليك كده وخلاص. كل وجع بيعلّم درس، لو فهمته عمرك ما هتقع في نفس الحفرة.

 التحليل النفسي للوجع

الوجع النفسي في الأساس رسالة من عقلك وجسمك بيقولك: “فيه حاجة مش مظبوطة لازم تتغير”. لو تجاهلت الرسالة، الوجع بيتحول لمرض.. اكتئاب، قلق، توتر مزمن. لكن لو سمعت له وواجهته، هيتحول لقوة وطاقة تعيد بناء نفسك من جديد.

 الجانب الإيجابي

بتطلع من التجربة أقوى.

بتعرف قيمتك أكتر.

بتتعلم تحط حدود.

 الجانب السلبي لو مسكتش زمام الأمور

هتفضل عايش في دوامة وجع.

ممكن تدخل في اكتئاب عميق.

هتدي للناس قوة إنهم يفضلوا يتحكموا فيك.

في الآخر، لازم تفهم إن وجعك مش هيتقلع ويتشال إلا لو إنت اللي قررت تشيله. متستناش من حد يعالجك، ولا من الزمن ينسيك.. إنت اللي تعالج نفسك بنفسك، وتقوم من جديد، عشان نفسك تستاهل.