إستغاثة مصير 

حاجه بايخه تحزن لما

اجي ادخل لشغلي يقولوا اقف عندك قضيه

سحبوا تصريح دخولي فضلت

انادي ولا حد بيسأل عليا

إمشي روح وابعد من هنا شوف

مشاكلك ف المحاكم و النيابه

عندك قضيه علي الجهاز لقتني

مغشي عليا وف اسوء حاله

قعدت اقول ياناس أنا برئ

ومش إسمي اللي موجود عندكم

والله ده اللي عندنا طيب ياناس إهدوا شويه محتاج لحلمكم

فيه حاجه إسمها اسم رباعي

وإسم الام وتاريخ ميلاد

ردوا وقالوا هوا دا اللي عندنا

إحنا بنكلم راجل مش عيل م الولاد

طبعا مكنش دا ردهم بس بفترض

إنهم بيعاملونا كمواطنين م البلاد

والله ماحصل وكإننا جينا بلادنا

لا لينا أهل نشبه أطفال سفاح

زايد عليهم هم الدنيا

وكمان القضايا والله مهي ناقصه جراح

العمليه مستكفيه لأ وقاعدين

بنخنق بعض شويه بشويه

ناقص كمان نسحب من جوا

الحلق الريق أو ممكن بلة الميه

ونموت قداهم عبيد لا ليا موطن

ولا أهل ولا دمعه تبكي عليا

إرحموا المساكين خلونا ننهض

بالبلد خلي قلوبكم فيها حنيه

ميبقاش رئيس البلاد نفسه

يخليها بلاد جميله ليها سحرها ودلالها

وإنتم حالفين قسم إنكم تختقوا

فيها وكمان في ولادها

ربنا يهدي بصيرتكم وتخلصوا ليها

وللغلابه اللي هم مساكينها