المقالات والسياسه والادب
ابدأ من أول وجديد وامسح اللي وجعك
كتبت/د/شيماء صبحي
في ناس كتير عايشه جوه دايرة مقفولة، دايرة فيها وجع قديم، ووشوش كسرتنا، وذكريات بنرجع لها كل ما نحاول نتحرك لقدّام.
بس الحقيقة إن اللي فات خلاص مات، واللي كسرنا عمره ما هيكون سبب في شفانا.
امسحوا كل حاجه قديمه.. كل حد وجعكم، كسركم، أو خلّى جواكم علامة مش بتنتهي.
سيبوا اللي تعبكم لله، وسيبوا نفسكم للحياة، يمكن المره دي تبقوا أخف، أهدى، وأنضج.
ماتستناش اللي وجعك يعتذر، ولا اللي غاب يرجع.
خليك أنت التغيير، خليك البداية.
ابدأ من نفسك، من يومك، من هنا ومن دلوقتي.
وخليني أقولك:
ابتدوا معايا أنا
أنا فاضيه ومفيش ورايا حاجه غير إني أشاركك أول خطوة في بداية جديدة.
صفحة بيضا.. نكتب فيها اللي نستحقه، مش اللي وجعنا.
نكتب فيها حبنا لنفسنا، وتصالحنا مع اللي فات، ورضانا باللي جاي.
الحياة مش واقفة على حد، ولا على وجع، ولا على ذكرى.
اللي عايز يعيش بجد لازم ينسى اللي كسره، ويختار نفسه للمرة الأولى.
خطوات البداية الجديدة:
1. نضّف جواك
اقعد مع نفسك واعترف باللي وجعك، بس أوعدني ما تفضلش فيه. اكتبه في ورقة، وبعدها امسحه أو احرقه، كأنك بتحرق الوجع من جواك.
2. اقطع الاتصال اللي بيأذيك
لو في رقم، صفحة، أو حتى أغنية بتفكرك بالوجع.. احذفها.
كل ما تقلل الرموز اللي بترجعك ورا، كل ما تمشي لقدّام أسرع.
3. ابدأ عادة بسيطة جديدة
مش لازم تعمل ثورة، خطوة صغيرة تكفي: كوباية قهوة على الهدوء، 10 دقايق تأمل، أو نزهة قصيرة. المهم تكون عادة لنفسك مش لحد.
4. ارجع تحب نفسك تاني
اهتم بيك، بشكلك، بأكلك، بنومك، وبطريقتك في التعامل مع نفسك.
قولها لنفسك بصوت عالي: “أنا أستحق راحة وبدء جديد.”
5. خليك ممتن حتى للوجع
اللي وجعك علمك، واللي بعد عنك خلاك تختار صح بعد كده.
قول الحمد لله، وكمّل، لأن الجاي يستاهل.
ابدأ من دلوقتي.. امسح الغلط، وابدأ صفحة جديدة.
وانا هنا.. مستنياك نبدأ سوا
ومن القلب
اعرف إن البداية الجديدة مش ضعف، دي شجاعة.
اللي يقدر يقول “كفاية وجع” ويبدأ من جديد، ده شخص قوي، ناضج، واتعلم من التجربة.
ويمكن ربنا بيجهزك لحياة فيها حب حقيقي، راحة بجد، وسلام داخلي مش محتاج تمثيل.
فخليك واثق إنك تستحق بداية نضيفة..
وكل اللي هتسيبه وراك، هتكتشف بعد شوية إنه مكانش خسارة،
كان درس علشان متقعش تاني.
ابدأ ومعايا، خطوة بخطوة، يوم بعد يوم،
لحد ما تبص حواليك وتقول لنفسك:
“أنا اتولدت من جديد.”
