احتمال التجربه

دكتوره فاطمه محمود

مهندس مكلف بعمل كوبري فصممه على أساس إنه يشيل حمولة 200000 طن وفعلاً نَفِّذ التصميم وكان رائع.

وجه يوم الإفتتاح ….

وبدأت العربيات تطلع الكوبري ، وبدأ الكوبري يصرخ ويقول : الحقوني .. هاقع .. أنا مش قادر أشيل ، دا أنا مش قادر حتى على حموله ١٠٠ طن

لكن المهندس فضل يقوله : ماتخفش ، أصل أنا إللي عملتك ، وعارف حمولتك كويس ، لسه بدري ، وبعدين إنت مش شايل الحموله دي لوحدك !! ، دي إيديَّا هي إللي شايله معاك.

وابتدت الحموله تزيد من 1000 ، ل 2000، ل 5000، ل 10000، ل 100000طن ، والكوبري مستغرب جداً إنه قادر يستحمل ، و يشيل الوزن دا كله ، ولسه موقعش ، ولا حصلّه أي حاجة !!

وزادت الحموله ….

لغايه ما بقت 200000 طن ، وبرضو الكوبري ماحصلوش حاجة !!

ساعتها بس …

فكر الكوبري وقال :

المهندس بتاعي بيحبني جداً ، وهو إللي صنعني ، وهو عارف حمولتي كويس ، وأكيد مش هايسمح بأي حموله زايدة أو أكبر مني ، لإنه ببساطة عايز يستخدمني ومش عايز يهدمني .

لله المثل الاعلى

إحنا كمان عاملين زي الكوبري دا !!

أوقات كتير بنقول ل ربنا إنت مزود الحمل علينا ، وإحنا خلاص مش قادرين نشيل !!

خلينا واثقين إن ربنا عارف حمولتنا كويس أصل هو اللي خلقنا وإيديه كمان هي اللي شايلة معانا الحمل ، وعمره ما هايخلينا نشيل ونتحمل أكتر من طاقتنا ، لأنه ببساطة بيحبنا

خليك واثق ان ربنا بيديك القدرة على إحتمال التجربة

و الحكمة لفهم الدرس منها والله ده فعلا حقيقي سبحان الله قادر علي كل شئ في مواقف كتير بنقول يارب القوه دي منين احمدك يارب علي قد الابتلاء بتعطي القوة و الصبر

دكتوره فاطمه محمود