اصول الاختيار بقلم عاطف سيد المحامى بالنقض والإدارية العليا والدستورية العليا

17

كام واحده في الدنيا رفضت تتجوز واحد عشان شكله، وراحت إتجوزت حليوه، طلع عين اللي خلفوها؟

كام واحده ماتجوزتش عشان شكلها..وهي كانت ممكن تبقى أحسن زوجه في الدنيا؟

كام واحد إترفض في وظيفه عشان مستواه الإجتماعي ولبسه مش قد كده، وإتاخد مكانه واحد بيتكلم إنجليزي بلكنه أمريكاني، وبيلبس جزم كلاركس وأقل كفاءه؟

إحنا ماشيين نتفاخر بأشياء، ليس لنا فيها أي فضل، وبنستعر من أشياء، ليس لنا فيها اي ذنب…وبنوزع أحكام قاطعه على بعض بلا أي دليل.

أصل الكتاب بيبان من عنوانه!!

لو الكتاب بيبان من عنوانه كان “مائة عام من العزله” بقى أكتر كتاب ممل في الدنيا، وكان “فيلم ثقافي” بقى فيلم عن الأدب الروسي إبان الثوره الحمراء..وكان زيزو نتانه قفل من زمان.

اللي ورث من أبوه ألف جنيه وخلاهم عشره، أحسن من اللي ورث من أبوه مليار وخلاه 900 مليون..

واللي مادخلش مدرسه بس علم نفسه إنجليزي بنطق مكسر وزي الزفت، أحسن من اللي أهله دخلوه الجامعه الامريكيه وقعد يسقط فيها.

والوحشه اللي هتراعيك وتربي عيالك، أحسن من الحلوه اللي هاتخرب بيتك وتهملك وترمي عيالك.

كده أنا خلصت المواعظ اللي عندي، وفاضل لي موعظه واحده، وهي الموعظه الأم، اللي هاترمي بعدها المقال، وتبطل تقرا لي بعدها، وتقول الراجل ده بقى دمه تقيل كده ليه.

الموعظه هي، إن كل اللي فات ده، مش مواعظ.
إعتبرها صياعه يا عم..إعتبرها مفهوميه..بس لو أنت ماشي تحكم على الناس كده، أنت اللي هاتلبس.
هاتلبس في موظف إبن ناس هاتشغله عندك ويخسرك فلوسك لأنه مابيفهمش في الشغلانه، وهاتلبس في عروسه مزه تجرجرك في المحاكم وإحتمال تخلعك، وهاتحس إنك ناقص عشان أنت إتولدت فقير، أو قصير، أو ضعيف، أو مابتعرفش تلعب كوره زي ميسي.
عايز تحكم على الناس، إعرفهم وإتكلم معاهم وشوف أنجزوا إيه في حياتهم، ووبعدين إبقى إحترمهم أو ماتحترمهمش على هذا الأساس.
عايز تعيش حياتك كأنها قاعدة كاستينج طويله..أنت حر….