رياضة محلية
الأهلى صاحب المواقف الثابتة التي لا تتغير
كتب وجدي نعمان
دائما النادي الأهلى صاحب المواقف الثابتة التي لا تتغير فهو دائنا نادي المبادئ وتعالو نتعرف علي احد المواقف في الماضي مثل ما يحدث اليوم والامس :-
لو الأهلى متصدر الدورى .. مكنش خد الموقف ده
جمله من ضمن الجمل اللى ممكن تسمعها من زملكاويه فى أي موقف يحتمل فيه أكثر من وجهة نظر ، لكن المقال ده عشان مفيش أهلاوى يتأثر بالعبث ده
لان تاريخ الاهلى فيه الكثير والكثير اللى يثبت ان الاهلى دايما موقفه مع تكافؤ الفرص والشفافيه والعداله ، وهأقولك موقف واحد من مواقف كتير ( شكلنا هنرجع نوثق تاريخ تانى الظاهر كده )
موسم 1975/1976 كان الدورى مجموعتين والاهلى حامل اللقب تصدر مجموعته ومنتظر أول المجموعه الثانيه عشان يقابله ذهاب واياب لحسم اللقب
الصراع فى المجموعه الثانيه كان بين المحله بطل الدورى موسم 72/73 ورابع الدورى موسم 74/75
والزمالك خامس الدورى موسم 74/75
مباراة الزمالك والمحله فى ستاد القاهره شهدت واقعه أدت إلى إلغاء المباراه ، والمحله متقدم 2/1 على الزمالك فى الشوط الاول ألقت جماهير الزمالك الطوب والحجاره وأصابت لاعب المحله ونجم السبعينات عمر عبدالله فى رأسه .
هنا الحكم رزق شحاته قرر إلغاء المباراه واللائحة فوز الفريق الضيف وهو المحله وبالتالى صدارة مجموعته والصعود لمباراة الحسم أمام الأهلى على البطوله
اتحاد الكره ( كالعاده ) حاول يضرب اللوائح عرض الحائط ويعيد الوقت المتبقى من المباراه خاصة أن وكيل الاتحاد حسن عامر شقيق المشير عبد الحكيم عامر ( حسن عامر تولى رئاسة الزمالك أكثر من مره )
إعترض فريق المحله فى ظل ضغط اعلامى فى الصحف على حكم المباراه لدرجة ان البعض طالب بشنقه ( ده بجد مش هزار .. مطالبات مبالغ فيها ) وهنا كانت الدفه فى صالح الزمالك والقرار كان سيصدر لمصلحته وعلى فريق المحله أن يرضخ لرغبات الزمالك ، إلى أن تدخل الاهلى
تدخل الكبير برئاسة الفريق مرتجى وطلب تطبيق اللوائح وصعود المحله لمواجهته ، هنا هتقولى الأهلى عاوز المحله اسهل من الزمالك هاقولك راجع ترتيب الفريقين الموسم اللى قبله اللى ذكرتهم فى اول البوست
ولو راجعت ترتيب المجموعه هتلاقى ان المحله لم يتعرض إلى هزيمه واحده حتى فى الدورى فى حين الزمالك تعرض للهزيمه مرتين منهم مباراة المحله الاولى غير مباراة الطوبه الشهيره
كبرت الأزمه وأصبح وجود الاهلى فى المعادله رقم صعب وعائق كبير امام اتحاد الكره فى ظلم المحله
هنا ظهرت أصوات تطالب بإلغاء الدورى ومنح الأهلى لقب البطوله بحجة انه الأعلى حصداً للنقاط فى المجموعتين ب 38 نقطه والمحله قبل مباراة الزمالك 34 نقطه والزمالك 33 نقطه
الطبيعى الاهلى يريح دماغه ويقول تمام براحتكم بقى وأنا أريح دماغى وأحقق اللقب المستحق أساساً من غير ما ألعب ماتشين ، لكن مش ده الاهلى يا بتاع لو الاهلى متصدر كان خد موقف تانى
الأهلى أصر على تطبيق اللوائح وهو ما رضخ له فى النهايه اتحاد الكرة المتزملك ولعب الاهلى والمحله مباراتين فاز بهما الأهلى وحقق الدورى عن جدارة واستحقاق
الزمالك كالعاده انسحب من مسابقة كأس مصر وإدعى المظلوميه الشديده وهدّد بتجميد النشاط وبكائيات استمرت سنتين
اشمعنى سنتين ؟ دول بيبكوا على جول حسن شحاته 43 سنه ولسه مستمر البكاء
هأقولك أنا ليه سنين ، لان نفس الفريقين اتقابلوا موسم 77/78 ولكن فى ملعب المحله ، ولكن اتقدم الزمالك بهدف مشكوك فى صحته ، وهنا ألقت جماهير المحله الطوب والحجاره وأصابت الحكم المساعد فقام حسين المرشدى حكم المباراه بإلغاء المباراة وطُبقت اللائحه دون صياح وبكاء وأعتبر الزمالك فائز 2/0
