الإحتياج..!! بقلم / يوحنا عزمي

45

 

 

في العلاقات كل واحد فينا جواه احتياج معين محتاج يشبع.. احتياج خاص جدا وشخصي جدا جدا..!

 

كأنه مثلاً قطعة واحدة ناقصة من بازل كبير .. القطعة دي مفيش زيها .. والقطعة دي هي القطعة الوحيدة اللي وجودها بيكمل البازل ويخليه لوحة فنية مميزة .. ليها قيمة .. وليها معنى..!

 

فينا اللي محتاج يحس بالأمان .. وفينا اللي محتاج يحس بالقبول .. وفينا اللي محتاج بس يحس إنه مفهوم..!

 

ومهما عدى علينا ناس .. محدش بيعرف حتى يلفت انتباهك إلا لما يلمس تحديداً الإحتياج ده جواك ويسدده..!

 

من غير تسديد الإحتياج العميق ده جواك .. تظل كل محاولات الأخر لإشباعك فارغة .. حتى لو جابلك الدنيا كلها وحطها تحت رجليك..!

 

وفي المقابل .. بمجرد ما يظهر في حياتك الشخص القادر على التلامس مع احتياجك الشخصي واشباعه بجد بينفع تتبنى بينكم علاقة مشبعة قادرة على النمو ومواجهة باقي تحديات الحياة..!

 

علشان كدة..!

وانت بتدخل اي علاقة ف حياتك ..

خليك مركز وعارف كويس ايه هو احتياجك الشخصي العميق اللي بدون اشباعه في العلاقة دي هاتفضل تايه وهاتفضل حاسس ان فيه حاجة ناقصاك..!

 

ساعتها هاتقدر تحدد إذا كان الشخص اللي قدامك ده هو الشخص اللي معاه مفتاحك الشخصي ولا لا.