الانتخابات الأميركية مهمه لمصر

56

بقلم الإعلامي/ يوحنا عزمي

واحد يقولي : هو انت ليه مهتم اوي بالانتخابات الامريكيه ومركز معاها اكتر من انتخابات مجلس الشعب ؟
الاجابه : طبعا لازم اهتم واركز معاها وكل مصري خايف على بلده لازم يهتم ويتابع بترقب ..

بس الواضح انك مش واخد لبالك ان طوال فترة حكم ترامب كان في ملفات كتير ساعدنا فيها حرفيا ومش هنلاقي رئيس امريكي تاني هيساعدنا زيه بالسخاء ده ..

عندك ملف سد النهضه .. راجع اخر تصريح لترامب عن سد النهضه وازاي كان بيهدد الاثيوبين ان مصر هتفجره..

تعالى شوف ملف الاخوان المسلمين وكيف ان ترامب دعمنا فيه وهتعرف ليه الاخوان بيكرهو ترامب جدا زي السيسي وواقفين مع بايدن في الانتخابات ..

ملف ليبيا ودعمه لموقف مصر في الخط الاحمر وتدخلها العسكري المحتمل في ليبيا لو اردوغان عدى الخط ..

ملف التسليح .. ترامب راجل تاجر وبيحب بلده جدا .. لما اردوغان اشترى صفقه الدفاعات الروسيه S400 ترامب عاقبه وحط عليه وقاله مش هسمحلك تستخدم السلاح ده وهخليك تحطه في المخازن وفعلا حصل ..

ملف تركيا .. ترامب كان بتويته عن تركيا واردوغان بيخسف بالليره الارض وكان دايما بيهزأه وقال عليه أحمق ..

ملف الغاز في البحر المتوسط وترسيم الحدود والمناورات العسكريه والاتفاقيات بينا وبين دول الحوض كانت كلها امريكا لم تعترض عليها ..

ملف الإرهاب وحربنا جوه وبره مصر كان ترامب بيدعمها وبيشيد بجهود الرئيس السيسي في مكافحة الارهاب
مفيش مره لقينا ترامب قال فين حقوق الانسان في مصر او اعترض او علق بالسلب عن اي احداث عن مصر ويمكن الراجل كان بيتغاضى عن حاجات كانت بتقلق اوروبا اليساريه ودكاكين حقوق الانسان..

ايوه حضرتك الانتخابات الامريكيه مهمه للمصري اللي فاهم وعارف قيمة ترامب لمصر طوال فترة حكمه وايه اللي عمله لبلدنا ..

وسواء ترامب كسب او خسر مصر متحضره لكل الاحتمالات واتمنى انه ينجح لانه حليف قوي وداعم لمصر.