الرئيس السيسي بنحاول كدولة نبذل كل جهد لإعداد إنسان متوازن ومسئول وحجم العلوم والمعرفة زاد بشكل كبير ويجب الاقتداء بالإمام السيوطى و الكلام يجب أن يرافقه العمل حتى يكون له تأثير و ليه ما بنستفدش من بعض المساجد ونعلم فيها ولادنا

كتب وجدي نعمان

أكد السيد الرئيس عبد الفتاح السيسي، أنه حرص على التواجد في حفل تخرج أئمة وزارة الأوقاف، لتهنئتهم وتوصيتهم.

وقال السيد الرئيس السيسي خلال كلمته بحفل تخرج الأئمة بالدورة التدريبية الثانية لوزارة الأوقاف بالأكاديمية العسكرية: “كنت حريص النهاردة أكون موجود معاكم اليوم ده، يوم تخرجكم، عشان أهنيكم وعشان أوصيكم”.

وأضاف الرئيس: “بنحاول دايما كدولة نبذل كل جهد لإعداد إنسان متوازن مسؤول حسب المهمة والعمل اللي هيكلف به، وإن وفقنا دا فضل من  ربنا سبحانه وتعالى، وإن لم نوفق فيبقى محتاجين نبذل جهد أكتر ونراجع نفسنا مرة تانية”.

وتابع السيد رئيس الجمهورية: “حاولنا من خلال الأكاديمية الوطنية للتدريب، إن احنا نضخ في شرايين مؤسسات الدولة ناس مؤهلة، ودلوقتي بنخلي من خلال أكاديمية الشرطة والأكاديمية العسكرية نساهم هذه المساهمة، الهدف منها محاولة ضخ نوعية حاولنا ننتقيها ونؤهلها بشكل على قد ما قدرنا، اشتركت في برامجكم”.

وقال الرئيس: “جبنا علماء، ودا في كل التخصصات، نفس واجتماع وإعلام نعمل الخريطة لتأهيلكم بمقتضاها”.

و أكد السيد الرئيس عبد الفتاح السيسي، أهمية الاقتداء بالأئمة الكبار، وعلى رأسهم الإمام السيوطي كنموذج يحتذى به، حيث قدم مساهمة استثنائية من خلال تأليف 1164 كتابًا خلال حياته.

وقال السيد الرئيس عن الإمام جلال الدين السيوطى خلال كلمته بحفل تخرج الأئمة بالدورة التدريبية الثانية لوزارة الأوقاف بالأكاديمية العسكرية: “إنسان عمره 62 سنة عمل 1164 مؤلفا، ولا كان في مطبعة من المطابع بتاعتنا، الكلام دا من 500 سنة ومكنش في الأدوات الموجودة دلوقتي، ازاي في 62 سنة عمل دا كله”.

وأضاف السيد رئيس الجمهورية: “مش بتكلم في العدد اللي عمله كرقم، بتكلم ازاي ربنا سبحانه وتعالى بإخلاصه وأمانته وفقه يعمل دا ويحققه ويستمر معانا ونتكلم عنه بعد 500 سنة”.

وتابع: ” هو عاش عمره كله 62 سنة مش 90 ولا 100، عمل 1164 مؤلف في كل المناحي اللي أتكلم عنها، البيئة وحاجات كتير جدا”.

واستطرد السيد الرئيس السيسي: ” باخد من العالم الجليل دا وبقول لكم، يمكن يكون الجديد موجود دلوقتي، مش خلال كل 100 سنة يبقى في عالم يعمل كده، لأن حجم العلوم والمعرفة الإنسانية زادت بشكل كبير جدا، يمكن هيبقى مؤسسة هي اللي هتقوم بالدور دا في يوم من الأيام وعملية تجديد، وعمل على رأس كل 100 سنة، هذا العمل كان بيعمله عالم واحد قبل كده”.

و أكد السيد الرئيس عبد الفتاح السيسي، على أن “الكلام” لابد أن يرافقه العمل، حتى يكون له تأثير.

وقال الرئيس السيسي خلال كلمته بحفل تخرج الأئمة بالدورة التدريبية الثانية لوزارة الأوقاف بالأكاديمية العسكرية: ” والواحد وهو صغير وقبل مني كانوا بيسمعوا في المنابر كتير، لكن يا ترى التأثير دا بيمتد قد إيه؟”.

وأضاف الرئيس: “ما لم يكن هناك عمل يرافق الكلام اللي بيتقال، أنا بقول لكم إن احنا هيبقى تأثيرنا مش كافي”.

وتابع: “الموعظة هتنتهي بفترة الخطبة مهما كان تأثيرها، ساعة ساعتين تلاتة، وذاكرتنا مش زي حافظة القدماء، كانوا بيحفظوا ألف بيت شعر، اللي بيسمعوه يوعوه كويس، مش كلنا كده دلوقتي، انت بتقول خطبة في المسجد وبعدين والناس بتسمع، ولكن النتيجة ايه؟”.

وقال: ” هل إحنا يطلق علينا الأمة الصادقة الآمنة؟ يقولك ازاي بتقولوا انتو أفضل وأحسن ناس، احنا مش كده، إن مكنتش تقدروا تحطوا إجابات رقيقة ورحيمة وموضوعية في تناولكم أى مسألة من المسائل، صدقوني، الإلحاد، معندكش عصاية سحرية، بتقول الإفراط والتفريط والتطرف والاعتدال، ممعكش عصاية سحرية تخليك معتدل”.

و قال السيد الرئيس عبد الفتاح السيسى: “يفوتك الكتير أوى، لو فاتك ومرضيش عنك، ولو متشرفتش بالإيمان به وذكره”، مضيفا: “حاولنا نعمل حاجة وقمنا بالدور دا، وفى دور يستكمل بيكم انتم وبتمنى لكم كل التوفيق، وأتمنى لكل الناس في مصر إن نبقى على قلب رجل واحد فى بناء الإنسان كل الإنسان، مش بس على المستوى الديني”.

وتابع السيد الرئيس عبد الفتاح السيسى، خلال حفل تخرج الدورة التدريبية الثانية لوزارة الأوقاف بالأكاديمية العسكرية: “احنا عندنا مساجد كتيرة جدا وعندنا في نفس الوقت حجم قليل من المدارس، وكان أيام النبي صلى الله عليه وسلم، تستخدم في كل شؤون الدنيا”، مردفا: “النهاردة ليه ما بنستفدش من المساجد الموجودة، بتشتغل بالكتير في كل صلاة 10 دقائق عشان نخلى فيها بشكل أو أخر – بعضها يسمح بها – نعلم فيها ولادنا كل أولادنا، يقولك نعمل مدرسة ونعمل جامع، ممكن أعمل الجامع ويبقى جواه المدرسة”.

وواصل: “كلام كتير احنا محتاجين نفكر فيه أكتر كتير إنك تعد خطبة كويسة أوى جميلة وتبقى سلسة”، مستطردا: “هتعمل ايه مع جيرانك وأولادك والدنيا اللى بقت مليانة كتير، وفى تطور حصل، هتبقى جزء منه، إن رفضته هتبقى بتتكلم فى خطاب قديم أوى”.

وأضاف الرئيس السيسى: “كل يوم صفحة التاريخ بتتغير وبيبقى فى تطور، محدش قال لى اتكلم فى إن الثوابت ممكن حد يمسها، لأن دى عقيدتنا”، موضحا: “أكيد التطور اللى بيحصل دا، أنت هتجد مثلا على مواقع التواصل لغة جديدة، غير اللغة اللى احنا متعودين عليها، لغة تانية، هتعمل إيه، هتتهم أصحابها إنهم كده، ولا تفكر فى حل”.

وأردف: “الناس كلها شايفة إن اللغة العربية مش لغة العصر، اللغات الأخرى هى لغات العصر والمعرفة، هتلاقي الولاد كلهم مش عاوز يتكلموا عربي، ما يتعلم في المدرسة اللغة بس ميبقاش حياته كلها نسيب لغة القرآن يعني”.

واختتم الرئيس السيسى: “كل سنة وانتم طيبين وربنا يوفقكم جميعا ويبارك في جهودكم جميعا وفي جهودنا ويجعلنا دائما يا رب في خدمة الحق والخير والإنسانية”، مضيفا: “مش هنسى إن أنا أقدم التعازي في وفاة بابا الفاتيكان شخصية عظيمة وشخصية كان لها إسهام رائع في الإنسانية، كل التعازي في وفاة بابا الفاتيكان”.