أخبارالسياسة والمقالات

الزوج العصبي

دكتورة فاطمه محمود 

فى اسئله كتير من القراء بتشتكى من الزوج …انه عصبي ومحدش بيحب يتكلم معاه والاولاد اتعقدوا نفسيا منه والزوجة تفكر فى الانفصال وهكذا…..طب ما نيجى نعرف ايه حكايه الرجاله ديه الاول قبل ما نحكم عليه …. 

معظم الازواج اللى بالوصف ده …تحسوه انطوائي وقليل الكلام مع العصبية واحيانا عدوانية كمان تجاه الاخرين …بنعتبر كل الصفات دى اعراض للمرض وليست المرض ذاته….يعنى ايه؟؟ يعنى ليها اسباب ودوافع نفسيه وتعتبر خفية للزوج نفسه …ميعرفهاش هو شخصيا..هو حاسس انه مضغوط وعصبي وحزين ومتمرد بس مش عارف ليه…بالظبط ذي اللى بطنه بتوجعه وبيرجع ومش عارف السبب …فلازم يروح لدكتور يشخص حالته اولا…بس مشكلتنا اننا مش مقدرين قيمة المرض النفسي…وانه محتاج للاهتمام اكتر من المرض العضوى…لإن ثبت حديثا ان اى مرض عضوى هو فى الاساس تكون نتيجة مكبوتات نفسية فى الاصل…ناهيك عن هدم الاسرة وتفكيك العلاقات ومعاناة المحيطين به نتيجه ذلك المرض النفسي المجهول… 

طب نرجع للحالة اللى بنتكلم عنها…الزوج ده بيكون مر بطفولة صعبة…وشاف معاملة ابوه لأمه اللى غالبا زمان كان الاب يشبه سي السيد والام تشبه شخصية أمينة…فالأب متشدد وشديد الغيرة وممكن يمد ايده ع مراته وممكن يكون متعدد العلاقات…وهكذا…فيجى الطفل اللى هو ( الزوج الحالى)…يرتبط بأمه نفسيا ويشعر بالغضب تجاه ابوه…فيكبت الغضب جواه لإنه مينفعش يواجه ابوه…وفى نفس الوقت يشعر بالعجز تجاه امه لإنه مش قادر يدافع عنها او يوفر لها الحماية….فيشعر بالغضب من نفسه ويحس بتأنيب الضمير تجاهها واللى بيفضل ملازمه طول عمره لغاية ما بيموت لو مقدرش يوصل لعقدته بدرى ويحلها…. 

فتلاقى الشخص ده حاسس بالضعف والعجز وقلة الحيلة من وهو صغير فيبدأ يحاول يعمل مشروع او يشتغل اى حاجة تحسسه بقيمته وتخليه يقدر ذاته من جديد…فيفشل فى كل حاجه ف حياته …لييه؟؟ عشان اللى راسخ عنده فى عقله الباطن انه فاشل وعاجز…فيجذب ليه تجارب فاشلة اكتر ..فى العمل والعلاقات كمان…لإنه من جواه من وهو صغير حاسس انه مش نافع فى شئ…. 

وحتى لو حقق مكاسب مبيتغيرش شعوره بالفشل جواه…ولا بيقدر قيمة نفسه …ليه؟؟ لإنه ميعرفش ان سبب وجود الشعور ده جواه مش الفلوس ولا النجاح المهنى ولا تعدد العلاقات…ده سببه وجهة نظر وهمية خدها عن نفسه وهو صغير وفضلت جواه مش واعى بيها ذي الفيروس بالضبط …ومأثرة عليه وعلى سلوكه وعلاقاته وافكاره وعمالة تنتشر وتتوغل ف حياته وهو مش فاهم ولا واعى ولا عارف…. 

طب الحل ايه؟؟ 

اننا نقتل الفيروس….نحل العقدة اللى موجودة من الطفولة…

انك تعرف ان وقت وقوع الظلم على امك هى كانت قادرة على الدفاع عن نفسها كشخص بالغ ومدرك ولكنها مدافعتش واستسلمت لتصرفات زوجها معاها وقبلت الظلم على نفسها…فديه قضيتها هى مش قضيتك انت… 

ثانيا…

انت كطفل وقتها او حتى لو كنت كبير مكنش ينفع تضرب ابوك او حتى تعلى عليه صوتك او تقول له اف حتى….عشان ده ابوك…والاولى ان امك كانت تدافع عن نفسها..وتضع حدا للامر..لحفظ قيمتها… 

وانت بقي ساعتها كطفل لا حول لك ولا قوة ..طب بتحاسب الطفل ده لغاية دلوقت ليه ع حاجه هو ملوش دخل فيها وكانت فوق استطاعته ف التوقيت ده؟؟ ماسك الكرباج ليه ونازل فيه ضرب من ساعتها ومش راحمه ؟؟ ارحمه…واعرف انك دلوقتى انسان بالغ وراشد وعندك القدرة بالله..قادر تقف…وتدافع…وترفع الظلم عن نفسك…انت انسان ذو قيمة..وقادر تحقق اللى انت عايزه…مفهومك القديم عن نفسك كان غلط…وانت صدقته…وعليك دلوقتى تغيره…. 

بالنسبة لأبوك بقي اللى عامل امك بقسوة ..فده كان درس لامك ربنا حطه قدامها عشان تتعلم تبقي قوية وتدافع عن نفسها ويبقي ليها كيان وتقدر نفسها…بس يمكن هى متعلمتش الدرس او اتعلمته متأخر…لكن فى النهاية كان قدرها….وما كان ربك بظلام للعبيد ..كل ساق سيسقي بما سقي…كل واحد هيتردله اللى عمله ..دى مش قضيتك انت….اخرج منها وسبها للحكم ..الحكيم…العزيز…العدل….الله…

نظف قلبك هو ده المهم…وسامح علشانك انت…وقل اللهم ارزقنى قلبا سليما…يَوْمَ لَا يَنفَعُ مَالٌ وَلَا بَنُونَ . إِلَّا مَنْ أَتَى اللَّهَ بِقَلْبٍ سَلِيمٍ} [سورة الشعراء:88-89]. 

طب نرجع بقي …للزوجة اللى بتقول جوزى عصبي ومش عارفه تتعامل معاه…

وده اللى هاتعرفه فى المقال القادم ان شاء الله

دكتورة فاطمه محمود

اترك تعليقاً

زر الذهاب إلى الأعلى