الشخصية النرجسية..! بقلم الإعلامي/ يوحنا عزمي

30

في مصطلح مهم اوي في العلاقات اسمه ال gaslighting

وده بيحصل لما طرف في العلاقة ( غالبا شخصية نرجسية) يبتدي يتلاعب بالطرف التاني ويشككه في أفكاره ومواقفه

وذكرياته وحقايق شافها بعينه لدرجة ممكن تهز ثقته في نفسه إلى أبعد حد ممكن وتخليه تحت سيطرة الطرف التاني

تماما ..

الشخصية النرجسية بتعمل ال gaslighting ده بطرق كتير زي مثلا الاستهزاء بمشاعر الطرف التاني واشعاره انها

مشاعر مبالغ فيها وغير مستحقه ( انتي دراما كوين – انتي حساسة جدا – انتي متجوزاني وانا مشهور ومالكيش حق تزعلي دلوقتي من علاقاتي النسائية) أو انه يقول كلمتين حلوين في نص ميت كلمة وحشة علشان يحسس الطرف التاني كإنه أب بيقسوا علي ولاده علشان بيحبهم وعلشان الطرف التاني يبتدي يحس انه اكيد بيحبني بدليل انه بيقولي كلام حلو أو انه يبتدي يقنعها ان الناس بتتكلم من وراها عليها وبتغلطها أو بإنه يحسسها ان أي سلوك ليها يضره هو سلوك غريب عليها وعلي شخصيتها ( انتي اتغيرتي- انتي ماكنتيش كده- انا اتصدمت فيكي) أو يشككها في احداث وحقايق
وذكريات حصلت بالفعل لدرجة ان الضحية ممكن يبتدي يتصور فعلا ان هو اللي بيتهيأله ..

الضحية بتبتدي بفعل ال gaslighting تبقي قلوقة
ومتوتره بإستمرار وأقل ثقة في نفسها وفي تصرفاتها وبتتسائل دايما اذا كان العيب فيها وهي اللي حساسة زيادة عن اللزوم ومزوداها وبتحس دايما ان كل حاجه بتعملها غلط وبتتأسف كتير ورغم احساسها دايما ان في حاجه غلط بس بتفقد القدرة بفعل التلاعب علي تحديد الحاجه الغلط دي
وبتختلق دايما أعذار للطرف التاني في نفس الوقت اللي بتجلد فيه نفسها بإستمرار وبتبطل تشرك اصحابها وأهلها بمعلومات عن شريكها وعمايله علشان تتجنب المواجهة
وبتنعزل عن دوايرها وبتفقد قدرتها علي اتخاذ القرارات وبتفقد المتعة في حياتها بالكامل ..

الشخصية النرجسية بتتلاعب بذكاء كبير ومش بتسيب دليل وراها ولكن دايما رسايلهم واحده: انت مالكش حق في مشاعرك ، انت بتتصرف غلط ، بس انا هبقي احسن منك
وهسامحك، رسالة واحده مكررة مابتتغيرش بتغير الوجوه
والظروف والأحداث.