الكحك والبسكويت ” مبادرة سلوكك ينعكس على غيرك فكونى على قدر المسؤولية

السلام عليكم ورحمه الله وبركاته

كل عام وحضراتكم بالف خير 

***عدنا من جديد ولا لاستغلال وجشع التجار ***

معاكم أختكم فى الله الفقيره لله الدكتوره نجلاء كثير 

أبوحماد شارع عمرو بن العاص

تحدثت بالأمس القريب عن كيفية ضبط سوق الخضار ومبادرة كن مع جارك سند وكذلك لصغار التجار الذى انعكس غلاء الأسعار عليهم بشكل متباين فمنهم من جلس فى منزله بلا عمل مهدد بالحبس من قبل التجار الكبار لأنه لم يسدد مديوناته القديمه ولا يملك ما يشترى به اليوم ليقتات هو و أسرته ……

والمبادرة كانت باختصار لمدة أسبوع أو إثنين وهى أني اتفق أنا وجيرانى ونشترى جمله سواء من مزارع وهذا أفضل بكثير أو تاجر جمله قفص طماطم وشيكارة بطاطس وخيار وفلفل وهكذا من الأساسيات اللازمه ويتم توزيعه علينا حسب الاحتياج دون اسراف أو تبذير أو تخزين ……

««اليوم نتحدث عن فرحة العيد»»

**الكحك والبسكويت والبيتفور **

وهنتكلم بالعاميه لتوصيل الفكره للجميع ..

من يوم 15 رمضان يبدأ “حماده تانى غير حماده الأول”

 وهو الإستعداد للعيد وفرحة العيد اللى مش بتكمل غير

 *”بكحك وبسكويت العيد والشيكولاتة وغيرها “*

وطبعا بتكونى حضرتك عمله ميزانيه لكده بس أكيد أن الميزانية بعد غلاء الأسعار اتلخبطت وباظت وطبعا مش تفكرى أنك لوحدك اللى شيله الهم لا كلنا وحياتك شيلين الهم وكمان أزواجنا اللى هيتصب همنا ده عليهم وعلى أيامه لحد ما يجى العيد ويعدى بسلام ….

السنادى فكرى تكونى ايجابيه اكتر من ذى قبل بمعنى :-

أولا نأتى للكمية :

 بدال حضرتك ما تعملى كمية كبيره بتترمى بعد كده أو تتشحت أو تتحط لطيور لا السنادى هعمل بدال الخمسه كيلو من كل صنف هعمل ثلاثه وبدال الثلاثه اتنين أفرح اسرتى بدون إسراف وعبء ليا ولزوجى واعملى حسابك أن فى مواسم بيجى فيها ليكى كحك وبسكويت وغيره يعنى بلاش تحطى عيشه على ام الخير وكله فى الاخر بيترمى ويبوظ واتحاسب عليه .

ثانيا الخامات : 

زى ما عملنا فى الخضار هنعمل فى الدقيق والسكر والسمنه أتفق مع جيرانى واجيب شيكارة دقيق تتوزع علينا وصفيحة سمنه كبيره أو اتنين تتوزع علينا وباكت سكر يتوزع علينا كده أنا وفرت فلوس كتير استخدمها فى شىء آخر .

وياسلام لو جنبك مزرعة دواجن اشوف جيرانى عايزين كام طبق والم منهم واجيب لينا جمله من المزرعه وده هيوفر ليكم كتير .

وبالنسبة”” لشكولاته وغيرها من التحبيش “”

ونظام الفرحه المعتاد قللى واعملى بالمثل اللى بيقول ” على لسانى ولا تنسانى “

بمعنى ليه اشترى كيلوات من كل نوع ممكن نص كيلو من كل نوع أو كيلو حسب حجم العيله وطبعا حضرتكم عارفين أن الكحك والبسكويت والبيتفور والشيكولاتة كترها مش صحى خالص بالعكس سعرات حرارية كتيره غير التسوس والتخمه اللى بتصيب ناس كتير بسبب أنهم بينسوا أنهم طالعين من شهر صيام ومعدتهم مش مستعده للعك ده اصلا.

((ونسيوا أن المعده بيت الداء))

بس ياستى لو نفذت الأفكار دى أكون وفرت بدون تبذير أو حرمان يعنى ياست الكل استفدتى حاجات كتير 

اولا :- وفرتى 

ثانيا :- مش نكدتى على جوزك ونفسك وعيالك وخففتى عنكم عبء كبير .

ثالثا :- اخدتى كوم حسنات وتذكرى قول الله تعالى ( إِنَّ الْمُبَذِّرِينَ كَانُوا إِخْوَانَ الشَّيَاطِينِ )

وان التبذير مش بس بياثر عليكى لا تخيلى حضرتك لما بتشترى كتير انتى وغيرك ده بيحرك السوق ويرفع السعر على ناس نفسها تفرح عيالها زيك بس مبتقدرش بسبب سلوكك انتى وغيرك السىء …

ولذلك تذكرى أن سلوكياتك تنعكس عليكى وعلى غيرك فكونى على قدر من المسؤولية

دمتم بخير 

      وكل عام وانتم بالف خير