المقالات والسياسه والادب
اللي بيُفضل زَيّ ما عرفناه كتبت/د/شيماء صبحى
اللي بيُفضل زَيّ ما عرفناه
عارف الناس اللي أول ما تعرفهم تقول:
“الله، دي روح حلوة، وشخص طيب، وكلامه من القلب؟”
بس بعد وقت… تتفاجئ؟
تكتشف إن في وش تاني؟
أو إن اللي كنت فاكره نقي… طلع بيغرقك؟
الحقيقة اللي وجعها ناعم وبطيء:
نادرون جدًا اللي بيفضلوا زَيّ ما عرفناهم أول مرة.
يا إما الزمن بيغيرهم…
يا إما إحنا كنا شايفين بعين قلوبنا مش بعين عقلنا.
وفي كل الأحوال، بتوجع…
لما تلاقي حد كنت شايفه سند،
ويبقى عبء،
حد كنت بتحكي له أسرارك،
ويبقى هو أول مصدر وجعك.
في ناس بتتغير عشان الظروف،
وفي ناس بتتغير لما تلاقي مصلحتها في وش تاني،
وفي ناس… عمرها ما كانت حقيقية أصلاً،
بس إحنا اللي لبسناهم تاج الطيبة على دماغهم!
بس وسط الزحمة دي كلها،
في ناس قليلين أوي… نادرين أوي…
بيفضلوا زي ما هم…
نفس القلب، ونفس الروح، ونفس الكلمة الحلوة اللي بتطبطب عليك وقت ضيقتك،
دول اللي لما تلاقيهم… إمسك فيهم بإيدك وسنانك.
لأنهم مش بس أوفياء…
دول عملة نادرة في زمن الوشوش المتلوّنة،
زمن الوعود اللي بتتكسر بسهولة،
والعلاقات اللي بتتباع بأرخص تمن!
لو لسه عندك حد في حياتك زي ما عرفته أول مرة،
ما تغيّرش عليه…
ما تظلموش بشكّك أو بترددك…
قول له: “شكراً إنك زي ما أنت… ومش ناوي تتغير”
