النرجسية وضحاياها

 دكتورة فاطمة محمود 

ومثل ماوعدتك عزيزى القارئ فى المقاله السابقه عن كيفيه اصطياد الشخص النرجسى لضحيته فإليك هذه المقاله 

النرجسي لانه بيحب الناس تمدحه فيطبق قانون الانعكاس بدون أن يعرف ويبدأ برمي الطُعم بأن يمدح الضحية انتي جميلة انتي حلوة ويعزلها عن شغلها وعن صحابها عاوز يمتلكها لما بتوافق وبترتبط بيه بتقع في الفخ لانه أول ما بيمتلكها يظهر الوجه الخفي ويقلب الترابيزة ويهدم اللي بناه ويتعمد ضرب الأمان عندها فهي تحس بالذنب وتعتقد انها هي السبب انها أذته فتشك في نفسها وتحبط وتتألم ، يتركها فترة طويلة كعقاب ، فهي تحتاجله لأنها أدمنته وادمنت إعجابه بيها لانه عودها علي كلامه الحلو ليها ، تحاول تبعد بس بتفشل لأنها متعلقة بيه مع انه بيأذيها نفسياً وقد يكون جسدياً ولكن مستنياه يرضي عنها عشان يقولها كلمتين حلوين

يستمر في ملاحقتها وتحطيمها حتي تفهم الرسالة

 النرجسي يصطاد مين ؟

يصطاد الشخصيه المتعاطفة جداً اللي بتيجي علي نفسها وتضحي بنفسها عشان خاطر الآخرين وبتهتم بغيرها اكتر من نفسها ، وبتنبهر بالمظاهر ، الشخصية الضعيفة التي تسمح للاخرين ان يتحكموا فيها ويقرروا تلبس ايه وتدرس ايه وتعيش حياتها ازاي ، اللي بتنتظر إشباع احتياجاتها من الأخرين

و ازاي نعرف الشخص النرجسي ؟

بيهتم بمنظره جدا شغله الشاغل شكله عامل ازاي قدام الناس لانه بيحب يجذب الانتباه وعاوز الناس تشوفه لأن زي ما عرفنا انه يتشاف دا جوعه من الصغر ، عنده كاريزما عالية وأناني ومغرور ومبالغ في أهميته لنفسه وشايف انه احسن من الناس وإن مش أي حد يفهمه وبيستغل اللي حواليه مصاص دماء ضحاياه لو بتتكلم معاه بتطلع خلصان تحس طاقتك استنزفت لأنه مصاص طاقة وقد يُمرِض نفسه عشان الناس تتعاطف معاه لانه بيستغل المتعاطفين ، كمان بيحب افتعال المشاكل والجدال ، يعتقد إن الناس تتآمر عليه وبتحسده وبتحقد عليه ولما حد بيتفوق عليه يغير ويحسده ويحقد عليه ، لا يراعي مشاعر الآخرين ويحب أن يراعي الناس مشاعره ويلوم غيره ولا يلوم نفسه 

يجد لذه في الانتقام بعقاب نفسي شديد وابتزاز عاطفي يصل للتهديد انه يسيبها او لو لقيها هتسيبه يقولها انه هيموت او هينتحر ( يعيش دور الضحية )

للنرجسي حيل كثيرة قد يحاول ان يغطي علي نرجسيته وكبرياؤه بأن يعيش دور المتواضع وإنه أقل من الناس أو دور الكريم وانه يشعر بالآخرين ليخفي بخله

و ازاي نتعامل لو في حياتنا شخصية نرجسية ؟

اولاً تفهمي رسالته انك تركزي في نفسك وتطوريها وتتحرري من الاحساس بالذنب ومن جزء كبير من الايجو وتعرفي حقيقتك وتكوني قوية متتأثريش بكلامه ومحاوله احباطه

وتتعلمي ازاي تكتفي بنفسك مادياً ومعنوياً 

ثانياً 

1- لو هو معترف انه عنده اضطراب الشخصية النرجسية وقرر يتعالج بشكل صحي تتواصلوا مع استشاري نفسي لأن ملهاش أدوية طبية وفي ناس بتتعالج بالتعامل النفسي

2- لو رفض العلاج ضروري تبحثي عن دعم او استشاري نفسي متخصص عشان تعرفي ازاي تتعاملي معاه لأن لكل حالة تعامل خاص.

دكتورة فاطمة محمود