انا لما أموت فضفضة قلم الشاعر سيد الكومى

انا لما أموت؟

بعد التأكد من الخبر بعد الثبوت..

مشهد وحابب اصوره قبل التابوت..

بدءا من امى..ولحظة ما تسمع الخبر..

 هتنصدم تصرخ وترقع أعلى صوت..

ياضنايا يابنى… ازاى تسيبنى ..

تصرخ فى وش اخواتى قايلة..

هاتولى اخوكوا أحسن هاموت..

يغمى عليها يفوقوها ..يهدوا فيها يصبروها..

يقولولها مات ..وأهو كلنا لازم نموت..

مشهد سكوت…

وبرغم عينى مغمضة لكنى شايف..

احساس غريب كلام ومتحاش ع الشفايف..

شامم روايح مسك واتاكدت عارف..

انى خلاص ع القبر رايح بس خايف..

من الدنيا خدت خلاص اجازة ..

وادينى متشال على الكتاف وفى جنازة..

الكل بيقول وحدوه ..

وانا ويا منهم ارد اقول لا اله الا الله

كنت زمان بقولها وياهم بصوت.. 

وانا ماشى على رجلى وبفوت..

على قبر من ماتوا وبندفن اى حد..

دلوقتى انا الميت ..على نعشى متثبت..

والقبر قبرى وهاندفن ..مودع الدنيا وبجد..

مشهد وداع…

انا اندفنت لكنى شايف الجموع..

وخلاص سابونى وودعونى بالدموع..

ويا المصير إن كان يسير او كان عسير ؟

مش مهم وماحدش هيشغل فى باله..

 المهم انى اندفنت وكل واحد راح لحاله ..

وترجع الساقية تلف وتلهيهم الدنيا الغرور..

وينسوا أن الكل رايح ومكانه فى الدنيا القبور..

ربنا يرحمنى ويسامحنى ويغفر للغير..

فى دنيا فانية ومش هتدوم والله كتير…

فضفضة قلم✍️ الشاعر سيد الكومى