فيه مواقف، كل ثانية بتقعد فيها أكتر، بتخسرك سلامك النفسي وكرامتك… فيه ناس وجودك معاهم بيستنزفك، بيأكلك من جوّه، وانت مش واخد بالك غير لما تلاقي نفسك اتكسرت.
انسحب لما تحس إنك بتتعامل كخيار احتياطي.
انسحب لما تلاقي احترامك بيتاكل حتة حتة.
انسحب لما تحس إنك بتجري ورا حد بيسيبك في النص واقف لوحدك.
الانسحاب مش ضعف… الضعف الحقيقي هو إنك تعافر في حاجة انتهت من زمان، أو تستنى من شخص أثبت مليون مرة إنه مش قد المسئولية ولا قد حبك.
الموضوع مش عناد ولا قسوة… الموضوع إنك تحافظ على نفسك، لأن محدش هيعمل ده غيرك.
انسحابك أحيانًا بينقذك من كلمة هتندم عليها، أو تصرف هتحاسب نفسك عليه، أو خيانة هتكسر قلبك أكتر.
افتكر… مش كل حرب لازم تكسبها، وفيه معارك الفوز فيها هو إنك تسيب أرض المعركة وتمشي مرفوع الرأس.
انسحب بكرامتك، وسيب وراك درس… إنك مش بتتربط بسلاسل مع حد، وإنك عارف قيمتك حتى لو هما مش شايفينها.
