عالم الطفل والمراءة والموضة
بحبه ياماما كتبت/د/شيماء صبحى
بحبه ياماما
كتير من الأمهات بتتخض لما تكتشف إن بنتها بقت تتكلم مع ولاد أو حتى ارتاحت في التعامل معاهم، والخضة دي طبيعي جدا.. احنا عندنا قيم ودين بيحكمنا..
البنات في سن المراهقة بتنضج عاطفياً أسرع من الولاد، وبيكون عندهم ميول طبيعية للتعامل مع الجنس الآخر. لكن القلق بيجي من خوفنا إن علاقتها تتطور أو إنها تجرّب حاجة ممكن تندم عليها
لما تعرفي حاجة زي كده، حاولي متتعصبيش.. أكيد صعب جدا إنك متتنرفزيش، وصعب إنك تمسكي نفسك إنك تضربيها كمان..
بس رد الفعل العنيف، زي الزعيق أو الضرب، أو حتى سحب الموبايل لفترات طويلة، بيدّي نتيجة عكسية.. لو انتي انفعلتي، بنتك هتبدأ تتجنبك وهتدور على طرق تانية تكلم بيها الولد ده من وراكي، وده مش في صالحك ولا صالحها للأسف
دي خطوات هتساعدك تتعاملي بحكمة
1. اسمعيها وحاولي تسأليها بلطف:
“إيه اللي بيريحك في الكلام معاه؟؟” أو “ليه حسيتي إنك محتاجة تحكي للولد ده عنك وعن حكاياتك؟”.. الأسئلة دي تخليها تفتح معاكي قلبها، وتبدأ تفكر هي ليه لجأت لكده..
2. اشرحيلها قيمتها وقدرها:
خليها تحس إن ليها قيمة كبيرة عندك، وإنها تستاهل تعامل محترم.. احكيلها إن في الوقت المناسب ربنا هيكرمها بشخص يستحقها لما تكبر وتكون قادرة تقيم الناس بشكل ناضج..
3. فهميها إن المشاعر دي فيها مخاطر:
اتكلمي معاها عن إن المشاعر جميلة، بس أوقات بتكون خطر، لأن التصرفات في السن ده ساعات بتكون غير محسوبة.. وضحيلها إن أي علاقة في سن صغير ممكن تجيب مشاكل نفسية وعاطفية صعب تتجاوزها لو حصلت حاجات مش محسوبة..
4. ركزي على علاقتكم وادعميها:
خليكي قريبة منها واخرجي معاها، اعملي معاها حاجات بتحبها زي الشوبينج أو الكافيهات.. كلميها كأنك بتحكي عن نفسك وانتي صغيرة، دايماً خليكي مصدر للأمان والحب..
5. اشغلي يومها:
خليها تشتغل على أنشطة جديدة، رياضة، دروس، أو نشاطات اجتماعية. لما وقتها يبقى مليان، تركيزها هيقل على الولاد..
6. مهم إن الأب أو الأخ يكونوا جزء من حياتها:
لو الأب موجود في حياتها، خليه يشجعها، ويديها إحساس بالأمان، وتحس إنها مميزة.. لو الأب مش موجود، يبقى ممكن أخوها، أو عمها أو خالها يساعد في ده، ويديها الإحساس إن فيه ذكور بيحترموها ويقدروها..
7. التدرج في العقاب:
لو استمرت في نفس الطريق، هنا ممكن تلجئب للعقاب، بس بهدوء.. خدي الموبايل مثلاً ليومين لو كلمته تاني، وبعدين زودي المدة لو استمرت.. متكونيش عنيفة عشان تديها فرصة إنها تتراجع بنفسها من غير ما تعند معاكي..
8. اتكلمي عن حدود ربنا:
وضحيلها آية “وقل للمؤمنات يغضضن من أبصارهن.” واشرحيلها أد إيه الدين بيحط قواعد لحمايتها.. وأد إيه ربنا رحيم بينا..
كل اللي بتحسيه من قلق عليها طبيعي، وخوفك عليها مش غلط، لكن خليكي معاها بتدعميها وتفهميها بهدوء، ده هيساعدها تفضل قريبة منك وتعرف تختار أحسن قدام..
