تاريخ قصه ألف ليلةوليلة

41
اعداد الكاتب سمير الشرنوبي
بلغني أيها الملك السعيد ذو الرأي الرشيد …….
اكملي يا شهرزاد…. مولاااااااااااي
وأدرك شهرزاد الصباح فسكتت عن الكلام المباح
كوكووووووووو
احكي يا شهرزاد، احكي لشهريار، اشغلي له ليله لطلوع النهار
ارتبطت حكايات ألف ليلة وليلة بمسلسلات شهر رمضان، بس التاريخ بيقول ان حواديت ألف ليلة وليلة ارتبطت برمضان من قبل ظهور التلفزيون والراديو، من أيام الحكاوي ع الربابة والرواة اللي كانوا بيمشوا يحكوا حواديت في الشوارع والحارات في جلسات السمر في ليالي رمضان، كانوا بيحكوا حكايات كتير من تراث ألف ليلة وليلة، وبعد ظهور الإذاعة قرر الكاتب الكبير طاهر أبو فاشا كتابة حلقات إذاعية درامية من ألف ليلة وليلة، وأخرجها وقتها الإذاعي الشهير محمد محمود شعبان المعروف ببابا شارو.
مسلسل ألف ليلة وليلة الإذاعي خرج أول مرة للنور في رمضان 1955م، بصوت الفنانة الكبيرة زوزو نبيل في دور شهرزاد، واللي كان صوتها بياخد المستمعين لرحلة بعيدة في عالم الخيال والسحر وارتبط صوتها بالعالم ده في أذهان أجيال كتير من اللي اتربوا على الإذاعة، أما صوت شهريار فكان للفنان عبد الرحيم الزرقاني، واستمرت حلقات ألف ليلة وليلة الإذاعية 26 سنة اتذاع فيهم 800 حلقة، وبقى من أهم البرامج التراثية في الإذاعة المصرية اللي بتتعاد كل فترة لحد دلوقتي.
لما ألف ليلة وليلة وقفت في الإذاعة وبطلوا ينتجوا حلقات جديدة منها بعد وفاة أغلب القائمين عليها، اتحولت الليالي للتلفزيون، أول مسلسل تلفزيوني اتعمل عن ألف ليلة وليلة كان سنة 1983م من إخراج المخرج عبد العزيز السكري وسيناريو الكاتب الكبير أحمد بهجت، وكانت شهرزاد فيه هي الفنانة الكبيرة نجلاء فتحي وشهريار الفنان حسين فهمي وظهر في المسلسل فنانين كتير من أهم فنانين مصر وقتها منهم: عبد المنعم إبراهيم وشكوكو وتوفيق الدقن وفاروق فلوكس، وكان تتر المسلسل أغنية “احكي يا شهرزاد” للفنانة “سميرة سعيد” واللي حقق نجاح كبير وقتها وبقت من أهم وأشهر الأغنيات وكل الناس فاكرينها لحد دلوقتي.
ومن بعدها بقت ألف ليلة وليلة تقليد رمضاني لازم يكون موجود في الخريطة التلفزيونية في رمضان، وشارك في المسلسلات دي فنانين كتير على اختلاف المواسم واحتفاظ المسلسل باسم ألف ليلة وليلة، ومن الفنانين اللي عملوا أدوار شهرزاد وشهريار: ليلي علوي وحسن يوسف، أحمد عبد العزيز وبوسي، ومحمد رياض وبوسي، ودلال عبد العزيز ويحي الفخراني واللي مسلسلهم اختلف في كونه كان قصة واحدة من ألف ليلة وليلة وهي علي بابا والإربعين حرامي من غير وجود لشهرزاد وشهريار وشاركهم البطولة الفنان الكبير الراحل أحمد مظهر.
كل المسلسلات اللي فاتت دي كانت محتفظة بالقصة الأصلية لألف ليلة وليلة، وهي إن الملك شهريار بيتعرض للخيانة من زوجته فبيقتلها ويقرر إنه يتجوز بنت جديدة كل يوم ويقتلها قبل ما يطلع عليها النهار، لحد ما كل بنات المملكة خلصوا سواء بالقتل أو بالهرب، ومفضلش غير شهرزاد بنت الوزير اللي كان مخبيها عشان الملك ميتجوزهاش ويقتلها، بس هي قررت تخوض التجربة وتحاول تغيره وتخليه يثق فيها ويبطل يقتل الستات ويتهمهم بالخيانة، وده من خلال انها تحكيله كل يوم حكاية لحد الفجر وتنام قبل ما تخلصها فميقتلهاش على أمل انها تكمل الحكاية تاني يوم؛ فتلضم في حاية تانية وهكذا لحد ما كملت ألف ليلة وليلة وكان وقع في حبها وخلف منها فقرر يعفو عنها وغير نظرته للموضوع.
سنة 2004 اتعرض أول مسلسل ألف ليلة ولية مخالف للقصة الأصلية من بطولة فاروق الفيشاوي ونرمين الفقي، في المسلسل ده كانت الأدوار متغيرة، البطلة اللي كان اسمها جليلة مش شهرزاد هي اللي كانت ملكة وبتقتل الرجال، والبطل كان بيحاول يهرب من القتل بانه يحكي لها كل يوم حكاية جديدة، سنة 2010 اتعرض مسلسل مش ألف ليلة وليلة من تأليف وليد سيف واخراج أحمد فوزي وأماني نجيب، وكان من بطولة أشرف عبد الباقي وريهام عبد الغفور.
المسلسل ده مكنش فيه حواديت وحكايات من ألف ليلة وليلة خالص، ولكن كان بيدور عن تمرد شهرزاد على شهريار، من خلال انها شافت حلم اتكرر معاها كذة مرة ولما سألت العرافة عن تفسيره قالت لها معناه ان باقي لها يومين بس مع جوزها وبعدين هيقتلها زي اللي قبلها، فققرت انها تعمل جيش من الستات واشترت جواري كتير واتفقت مع زوجات الوزراء ان كل الستات تتدرب على فنون القتال عشان يقدروا يتغلبوا على شهريار ورجالته قبل ما يقتلوهم هم.
سنة 2015 اتعرض آخر مسلسل لحد دلوقتي من مسلسلات ألف ليلة وليلة من بطولة نيكول سابا وشريف منير، القصة اختلفت في ان اللي اتعرض للخيانة هو أبو شهريار مش شهريار نفسه، وهو اللي وصى شهريار بالانتقام من الستات من بعده وهو على فراش الموت، وشهرزاد لما اتجوزت شهريار مكنش بنية تغييره واصلاحه لكن كان بنية الانتقام منه لانه كان السبب في موت أمها بقوانينه ضد الستات، وأبوها مكنش وزير لكن كان صاحب الوزير وعنده مزرعة خيول على حدود المملكة، وبينتهي المسلسل بهروب شهرزاد وهي حامل من شهريار ومعاها أختها دنيازاد وأخو شهريار الصغير اللي بيحب دنيازاد وقوانين المملكة كانت منعاهم من الجواز.
في كل المسلسلات القديمة كان النجوم اللي بيعملوا دور شهرزاد وشهريار هم اللي بيمثلوا القصص اللي بتحكيها شهرزاد، ومكنش في أي تفاصيل عن حياة شهرزاد وشهريار الشخصية ومملكتهم خلال المسلسل، لكن في المسلسل ده كان في تفاصيل كتير عن مملكة شهريار وإزاي بيمارس حكمه وعلاقته باخواته وبالممالك التانية، والقصتين اللي حكيتهم شهرزاد لشهريار في المسلسل ممثلهمش نيكول سابا وشريف منير ولكن كان في ممثلين تانين شاركوا في البطولة وهم: أمير كرارة وآسر ياسين ونسرين طافش وعلياء المغربية.
من بين كل المسلسلات اللي اتعرضت عن ألف ليلة وليلة ايه أكتر مسلسل فاكرينه ومعلق معاكم ومش ممكن تنسوه أبداً؟ وهل في رأيكم أن ألف ليلة وليلة زمان كانت أحلى ولا دلوقتي؟ هل تطور المؤثرات البصرية والجرافيك اللي مكنش موجود زمان ضاف روعة وسحر على القصص الخيالية اللي بتحكيها ألف ليلة وليلة ولا مكنش ليها تأثير؟ هستنى ردودكم وآرائكم في التعليقات، تحياتي وتقديري لمعاليكم السامية