تراكم المشاعر
تراكم المشاعر
بقلم د/إلهام حسنى
تراكم المشاعر من اكتر الحاجات اللي بتهد الانسان من جواه من غير ما يحس
احنا كل يوم بنعدي بمواقف كتير
كلمة وجعتنا وسكتنا تصرف ضايقنا وعدينا
نظرة كسرتنا وقلنا مش مهم
وموقف احتجنا فيه حد وماكنش موجود
المشاعر دي كلها ما بتمشيش
هي بتفضل جوانا تتراكم يوم ورا يوم
لحد ما القلب يتقلوالنفس يضيق والروح بتتعب
و تراكم المشاعر يعني انك تحس ومتعبرش
تزعل وتسكت
تغضب وتكتم
تتوجع وتضحك
وتفضل تقول انا تمام بس الحقيقة انك مش تمام
انت بس متعود تخبي في الاول بتستحمل
وبعدين بتقول اهو يوم وعدى وبعدها تقول كله هيعدي
لكن اللي بيعدي هو الوقت اما المشاعر فبتفضل جوه
اكتر مشاعر بتتراكم جوانا هي الزعل اللي ما اتقالش
الغضب اللي اتكتم
الخوف اللي ما اتطمنش
الخذلان اللي ما اتعالجش
والتعب اللي اتسمى صبر
ونفضل نقنع نفسنا ان السكوت راحة
وان التجاهل حكمة
وان التحمل قوة
بس مع الوقت
السكوت بيتحول وجع
والتجاهل بيتحول برود
والتحمل بيتحول كره للحياة
تراكم المشاعر بيبان علينا بطرق غريبة
تلاقي نفسك عصبي من غير سبب
تعيط فجأة
تتضايق من اقرب الناس ليك
تحس انك مخنوق و ان صدرك تقيل
انك مش طايق كلام ولا دوشة
تحس انك عايز تبعد عن كله وده مش ضعف
ده نتيجة طبيعية لقلب شال اكتر من طاقته
الجسم كمان بيتأثر
صداع
وجع في المعدة
خفقان
تعب دائم
نوم متقطع
كل ده رسائل
رسائل بتقول ان في حاجة متشالتش صح
طيب ليه بنكدس مشاعرنا
لاننا اتربينا على ان الزعل عيب
وان العياط ضعف
وان اللي يشتكي تقيل
وان السكوت ادب
اتربينا نخاف نزعل حد
بس ما خفناش نزعل نفسنا
نرضي اللي قدامنا
ونكسر اللي جوانا
ومع الوقت
نبقى ناس بتضحك من بره
ومكسورة من جوه
اخطر حاجة في تراكم المشاعر
انه بيخليك تنفجر في وقت غلط
ومع شخص مالوش ذنب
او تطفي فجأة تبقى بارد
مش فارق معاك حاجةولا حد
وتفتكر انك اتغيرت لكن الحقيقة انك تعبت
التفريغ شئ أساسى ده ضرورة
انك تتكلم تكتب تعيط تقول لا تعترف بزعل
تطلب حقك ده مش انانية ده حفاظ على نفسك
المشاعر اللي ما بتطلعش بتفضل تحفر جوه
وتعمل شرخ في الروح
اتعلم تسمع لنفسك تحترم احساسك ما تقللش من وجعك وما تقولش اصل غيري عنده اكتر
كل وجع وجع
وكل قلب ليه طاقته
انت مش مطالب تستحمل على حساب صحتك
ولا تسكت على حساب روحك
الكلام اللي ما اتقالش هو اكتر حاجة بتوجع
والراحة مش في انك تشيل اكتر
الراحة في انك تشيل اللي يخصك بس
وتسيب اللي تقيل عليك وتفهم انك تستاهل تعيش بقلب اخف ونفس مطمئنه وحياة ارحم .بنت الحلم الكبير
