تضحيه الزوجه وعواقبها

68

دكتوره فاطمه محمود

لما تلاقي ان علاقتك مع جوزك بقت مضطربة و مليانة مشاكل..

او انك حاسة انه بيبعد و انك مبقتيش من اولوياته..

و قبل متجري علي الكوافير تقصي شعرك و تضربيه الاحمر العنابي التمام.. زي ما صاحبتك نصحتك..

او تروحي الجيم و تمشي على دايت اللي ينزل 15كيلو فى اسبوع…

“طبعا دول مشوارين مهمين مقدرش اعترض”

بس في حاجة اهم لازم نعرفها كلنا..

على فكرة مش لازم يبقي سبب نفور الزوج ان الزوجة مقصرة في حقه… لا بالعكس

ساعات تضحية الزوجة المفرطة و استمواتها انها ترضيه بيبقوا السبب..

ساعات الزوج بيطفش لما بيحس ان مراته معندهاش حاجة غيره في حياتها… مفيش اهتمامات عندها غير هياكل ايه و هيلبس ايه و هيقعد معايا اد ايه..

ساعتها بس بيحس انها مملة..فاضية.. مفيهاش جديد.. مواضيعها مكررة..

ساعتها بس بيبدأ يدور علي حاجة جديدة.. مثيرة.. عندها جديد تحكيه..

انا مقلتش انه هيدور علي واحدة تشاركه اهتماماته…لا هو هيدور علي واحدة يشاركها اهتماماتها… و توريله دنيا جديدة..

طيب انتي عارفة اننا كأخصائيين فى الاستشارات الزوجية بندين تضحية الزوجة عشان عارفين ان معظم الرجالة بيعتبروا تضحية الست … غباء و ضعف..

انتي عارفة ان دينك مقالش انك تضحي بحقوقك.. ايا كانت عشان اي حد..لا زوج و لا اولاد..

عارفة ان الراجل بيحب الست المستقله فكريا و اللي عارفه حقوقها و بتحافظ عليها حتي لو بين العكس..

عايزة منه اهتمام… اهتمي انتي بنفسك..

عايزاة يحبك… حبي انتي نفسك…

عايزاه يحترمك… احترمي انتي حقوقك و انوثتك و احتياجاتك