حرب تكسير العظام مابين صغار المربين والعتاوله الكبار والسيطرة على بورصه الدواجن

48

ابوسليم عبود…..

أستسمح حضرتك في شويه تركز معايا علشان كلنا زعلانين من الفراخ وان اسعارها بقت خيالية وده حقيقي وفي ناس وراه ومصممه تكمل في هذا الطريق دون النظر لعواقبه المدمره

اولا اللي بيربوا فراخ يطلعوا بالصلاه على النبي حوالي 70% مربيين الصغار اللي هما أصحاب المزارع الصغيره

و 30% شركات كبيري كل أصحابها رئيس اتحاد منتجي الدواجن و معظم أعضاء مجلس الإدارة الحاليين يمتلكون مزارع ومصانع اعلاف ومجازر تكلفة الفرخة عندهم اقل بكتير من تكلفة المربي الصغير ركز معايا ماشي .. قول ماشي

ايه اللي حصل علشان الفراخ توصلنا بالسعر الخيالي ده🤔

في حاجة اسمها بورصة الدواجن هي اللي بتتحكم في سعر الفراخ اللي بتخرج من المزرعة علشان توصل للمستهلك البورصة دي مقفولة من حوالي 7 سنيين والمربين الصغار اتنبح صوتهم علشان تفتح تاني ولكن لا حياة لمن تنادي

فابتدي السماسرة هما اللي يتحكموا في سعر الفراخ وطبعا بالاشتراك مع كبري شركات الدواجن ودي بالضبط خطة القضاء علي صغار المربين المسؤول عن إعادة فتح البورصة هو الاتحاد لانه الاب الشرعي للصناعة والمسؤول الاول عنها

طيب ليه الاتحاد مش بيتحرك هقولك

لأن 30% الشركات الكبيرة عايزة تخرج ال 70% المربين الصغار من السوق علشان يتحكموا في السوق وتزداد مكاسبهم وارباحهم كمان وكمان البحر يحب الزيادة

ومع أزمة الاعلاف وارتفاع أسعارها ابتدت معركة تكسير العظام بقا وقدروا يخرجوا معظم 70% اللي كانوا بيربوا وأصبحت الشركات الكبري الان هي المتحكمه الأولي والأخيرة في صناعة الدواجن في مصر وأصبحت تجني الأرباح الخيالية علي حساب المربين الصغار والمستهلك

إذا من يحاسب هؤلاء الأباطرة ؟؟؟؟

الذين هدموا صناعة واغلقوا مزارع وهدموا بيوت وجعلوا الشعب المصر يعاني من أسعار الفراخ الخيالية التي كانت ارخص بروتين في مصر ؟؟؟؟؟!!!!!

نتمني أن تتدخل الدولة بثقلها لمحاولة إنقاذ هذه الصناعة آلتي هي أساس فتح بيوت كتير تم أو في طريقها للإغلاق التام وتشريد أهلها