خالتي صفية ياشيخ بهلول

26

مايسة إمام إبراهيم

***********************

شوفت ياشيخ بهلول شوفت حالي و اللي جرالي؟

بهلول : مالك يابنتي ايه اللي صابك ؟

صحيت الصبح …..قلت اعمل اللي ربناأمرنا به وأزور خالتي صفية وبناتها

ليلي وتحية في عين شمس صلة الرحم بقى وكدا يعني

نزلت أنا والعيال وروحت أركب المترو ، كنا بندفع حزبة 28 ج تذاكر. ،مااحنا اربعة ،

وقبلهم برضه حزبة 12 ج ميكروباص من البيت للمترو ماعلينا مش مهم

دخلت اجيب التذاكر لقيت الموظف بيقولي 40 ج ياست

يالهوي ياحوستي ليه ياعم؟

قال التذاكر غليت

يهلول : وعملت ايه ؟ لغيت الزيارة؟

مطولش عليك قلت صلة الرحم أغلى ، الثواب يابت متخليش الشيطان

يلعب بدماغك وقمت متمطعه ومطلعة ورقة بـ 50 ج ودفعت وقلت خالتي برضه ومش خسارة فيها

بهلول: عداك العيب يابنتي أصيلة

مطولش عليك ياشيخنا وصلت عين شمس أنا والعيال وروحنا نركب الميكروباص

تاني قووووم ايه دفعت حزبه 12ج كمان وطبعا مينفعش ادخل علي خالتي بإيدي

فاضية ومكنتش فطرت انا والعيال فقلت اعمل واجب وآخد فطار ونعمل غدوية

عند خالتي فسحة بقى ، قوووم إيه دفعتلي حزبة 50 ج كمان فول وطعمية وبتنجان

وطرشي وعيش والراجل وأنا بدفع فلوس العيش معجبنيش كام رغيف كدا ملعبطين

وصغيرين فرجعتهم للراجل ، لقيته بيقولي احمدي ربنابكره مش هتلاقيه كدا دا ، راجل كداب ومفتري ربنا يسامحه

قلت بقى لازم نحلى بشوية فاكهه حلوين كدا لخالتي وبناتها والعيال مش واجب برضه ،
ودخلت على الفكهاني بوم طاخ هات مانجة على عنب على تين قووووم إيييه دفعت
حزمة 150ج كمان، قلت وماله ميضرش صلة الرحم وتهادوا تحابوا .
وصلنا عند خالتي وقضينا اليوم ياشيخنا والعيال لعبت وطول اليوم ضحك وكركره وآخر انشكاح
ماعلينا رجعت البيت وطبعا دفعت نفس ذات فلوس المترو والميكروباصات تاني في الرجوع أومال هنرجع على حمير يعني
بهلول. : طيب كويس فين المشكلة يابنتي مااليوم عدى وحلو اهو؟
المشكلة ياشيخنا إني اكتشفت إني في الرحلة دي صرفت أكتر من 400ج
ولما قلت لجوزي بص لي بصه أبولهب في فجر الإسلام وكان فاضل يحط السيخ المحمي
في صرصور ودني وقالي وعينه بتطق شرار ملكيش خروج من البيت تاني لا خالتك
ولا عمتك وقام سابني ودخل الأوضه ورزع الباب في وشي و نام
أنا مش مزعلني في الموضوع كله غير رغفين العيش اللي خالتي مرضيتش تاخدهم
ورجعتني بيهم للفراخ تفتكر الفراخ هترضى تاكلهم ولا مش هيرضوا زي خالتي ؟
واعمل ايه مع جوزي دا اللي عاوز يقطعني من أهلي والنبي مش كدا حرام ؟

بهلول: بخصوص العيش لخبطيه مع اي حاجة تداريه عشان الفراخ متعملش اضراب عن الأكل

وبخصوص جوزك احمدي ربنا انه مرماش عليك يمين الطلاق في الليلة

دي وصلى ركعتين شكر لله ، هو حرام فعلا بس مش عليه الحرام وزره على بيقطع صلة الرحم بجد ومش هيخليك تروحي لخالتك هنية

صفية ياشيخنا صفييييية، اااااه ياحببتي ياخالتي هئ هئ