دنيا ملياها المشاهد تنتشر والكل شاهد/ادم القطعاني يكتب

33

دنيا ملياها المشاهد تنتشر والكل شاهد
ابنها بيفدى بروحه و لسة برضو معاه نناهد

يا أخينا ادفع يا تنزل مش أخينا أنا أسمى جندى
هما ضحكوا عليك بالأصفر فى المعسكر فيلم هندى !؟
فهموك انك بطل و اننا بنموت فى لبسك !!
الكلام ده هناك فى جيشك أما أنا فمفيش ده عندى

ادفع اللى عليك و قوملى واقلع الكمامه ديا
و امشى قدامى يا اخويا قطار ابويا ومش تكيه
البطل قام بإحترام و بشموخ سمع الكلام
كان هيخرج عادى جداً دى نهاية المسرحية

قامت الحاجة صفية قالتله تنزل يعنى ايه !؟
عندى ابنى زيه زيك بفتخر و اتباهى بيه
طلعت من قوت عيالها اتنين على العشرين جنيه
و البطل لملم قروشه وهى جات تحلف عليه

القروش كانت معاه يادوب مواصلة عشان يروح
البطل بيصر يدفع عمر ما الأبطال تنوح
و المواصلة هتبقى مشي لحد بيتهم بالبياده
بوس ايدين أمك صفية شيلها فوق علمك و لوح

قولها راح أموت فداكى و أبتسم لحظة شهادتى
أصلى هفتكرك ساعتها لما شيلتى همى شيلتى
وماتزعليش من عم نيلة اللى نزل من كرامتى
لو عليا خناقة زى خناقة الأهلى و بيراميدز
كان زمانه نفسه بس فى صورة منى ومع سعادتى

مشهد اتزاع و انتشر سمعوا بيه كل البشر
طب وكام مشهد مابانش والبطل حقه اتهدر !!؟
العلم راسم دراعه يافطة الجيش فوق جيوبه
بس مسئول القطار أعمى البصيرة مش البصر