رابعة ابتدائي تحدي جديد مع الوقت 

كتبت/دعاء موسى

رابعة ابتدائي بقت معضلة ومشكلة اكبر من مشكلة الشرق الأوسط أولياء أمور ومعلمين وطلاب تايهين ووزير في كوكب تاني خالص. صحافة وتلفزيون وهاشتجات ونوانب مجلس النواب وخبراء مناهج كلهم بيطالبوا بتفسير لما يحدث في رابعة ابتدائي. ليرد علينا سيادة الوزير بمقولة عجيبة غريبة لا تمت للواقع بصلة وهي ان المنهج جميل وان مفيش شكاوى من أولياء الأمور وان المدرسين مدربين على شرح المنهج والمدارس ماشية مع الخريطة الزمنية كويس جدا وان أولياء الأمور ملهوش دعوة اذا كان المنهج طويل ولا قصير. وبعدين يقول ايه سيمتحن الطالب فيما تم دراسته في المدرسة طب سيادتك المدارس لسة في منهج اكتوبر اه وربنا لسة في منهج اكتوبر حلو جميل معنى كدة اننا هنمتحن في منهج اكتوبر يرد علينا وقولنا لا الامتحان حتى منتصف نوفمبر وفقا الخريطة الزمنية للمنهج الخريطة الزمنية دي بتقول ايه بقى بتقول ان المفروض الولاد يمتحنوا في ايه بقى ١٨درس لغة عربية متمثلة في ٣ َ موضوعات كل موضوع ٦ دروس و ١٨درس لغة انجليزية متمثلة في ٣ وحدات كل وحدة ٦ دروس و ٢٤ درس ساينس متمثلة في أربع مفاهيم كل مفهوم ٦ دروس و٨ دروس دراسات اجتماعية متمثلة في وحدة ومدرسين من الوحدة الثانية و٢٥ درس ماث متمثل في ٤ وحدات. غير طبعا ٥ دروس مهارات مهنية و٨ دروس كومبيوتر غير التربية الدينية ١٢ درس. 

الدراسة بادئة يوم ١٠ أكتوبر حتى منتصف نوفمبر يعني شهر وكام يوم بمعدل ايام الدراسة الفعلية بدون إجازات ٢٥ يوم تقريبا حضور فعلي في المدرسة. 

هل يعقل ان الكم دة كله تم دراسته في ٢٥ يوم دراسي اللي حصة الواحدة ٢٥ دقيقة بمعدل ١٠ حصص لغة عربية ٢٥٠ دقيقة اسبوعيا ٦ حصص لغة انجليزية ١٥٠ دقيقة و٤ حصص ساينس ١٠٠ دقيقة و٣ حصص دراسات ٧٥ دقيقة وحصتين مهارات مهنية ٥٠دقيقة وكمبيوتر حصتين ٥٠ دقيقة وتربية دينية حصتين ٥٠ دقيقة. 

باي منطق و يعني ايه ولي الأمر ملهوش دعوة بالمنهج طويل ولا قصير ما هو الأمهات وأولياء الأمور مسحولين مع العيال دة البيت اللي في طالب رابعة ابتدائي بقى في حالة طوارئ اكتر من الثانوية العامة و بعدين ماشي الامتحان على مخرجات التعلم وقياس ما تم تحصيله طب ايه هي مخرجات التعلم اللي حضرتك عايز الولاد يطلعوا بيها محدش عارف طب ما هو الطالب ملزم يخلص المنهج علشان يفهم والوقت قصير لا ملكوش دعوة الوزير بس هو اللي فاهم سيكولوجية الطفل حتى قانون النسبة والتناسب لاينطبق على المنهج والفترة الزمنية لا الوزير لغى القانون دة تماما. 

واخر إبداعات سيادة الوزير طارق شوقي ان اختبار ديسمبر ملهوش نتيجة معلنة لأولياء الأمور طب ازاي هنعرف اذا كان ولادنا فهموا وحصلوا المطلوب ولا لا؟ 

وانتم مالكم يهمكم في ايه تعرفوا تعبكم وسحلتكم انتم واولادكم حققت النتائج الرجولة ولا؟ 

هو احنا فئران تجارب ولا عينات عشوائية ولا متطوعين لإجراء اختبارات على تجارب سيادتك العلمية الفذة؟ 

احنا ناس بقت بتوفر في الأكل والشرب واللبس علشان تدفع لاولادها فلوس الدروس حتى الكومبيوتر بقى بيتاخد فيه دروس؟ 

هو سيادتك مش بتستجيب ليه لطلبات الإحاطة في مجلس النواب؟ 

هو حضرتك ليه واخد الموضوع تحدي مع الطلاب وأولياء الأمور؟ 

تعبنا نقول مش ضد التطوير احنا ضد التدمير الاعتراف بالخطأ وإصلاح لا يعيب ولكن ما يعيب هو التمادي في الخطأ. 

إعادة توزيع المنهج لا يعيب التطوير وإنما يخدم التطوير حتى تتسني الفرصة للطالب والمعلم بالاستفادة من هذا التطوير. 

هدفنا جميعا مصلحة اولادنا وتقدم بلادنا. 

اكتب هذا المقال لعل و عسى أن نجد استجابة من سيادتكم. 

او نجد من يوصل صوتنا الي الاب سيادة الرئيس عبد الفتاح السيسي.