رسالة من رجل بسيط لكنه عظيم ارحموا من في الأرض يرحمكم من في السماوات والأرض
كتبت/ جيهان مشعل
النهاردة عامل النضافة كان جاي ياخد الزبالة .. ومن
التوعيات اللي بشوفها حطيت الكمامات المستعملة والجوانتيات في
كيس لوحدها خالص وربطتها وبعدين حطتها في كيس كمان .. عملت
كده واديته الزبالة والكيس ده لوحده بص للكيس كده وقالي : الله
يكرمك يا ابنتي والله العظيم إنتي بنت أصول محترمة .. تعالى
هوريكي حاجة يا أبنتي معلش
نزلت معاه لقيت العربية الصغيرة اللي بيجرها وبيحط فيها الزبالة كلها
كمامات وجوانتيات .. واكياس زبالة الكمامات محطوطة على وش
الكيس .. راح مشاور ليهم وقالي : أنا معنديش مشكلة يا أبنتي إن
ضهري ينحني في الشغلانة دي .. واقسم بالله ربك يعلم إن ضهري أنا
ما حاسس بيه من الوجع .. بس زي ما بسمع ان الحاجات دي فيها
مرض والناس بترميها في الشوارع عادي وأنا اللي بلمها .. بنحني عشان
اموت .. طب مين قال إن أنا مبخافش زي الناس دي .. انتي قد ابنتي
وهحلفلك اني اقسم بالله خايف اكتر منهم .. أنا عندي عيال .. وخايف
عليهم أكتر ما خايف على نفسي .. والعواجيز بيموتوا ولو لاقدر الله
حصل البيت هيتشرد .. أنا كل يوم بلمس الحاجات دي وبتعامل معاها
.. وببقى هاين عليا أعيط لأني مش عارف أقعد في البيت ولازم أنزل
أشتغل
أنا حسيت وقتها إن الأرض عاوزها تنشق وتبلعني بجد .. الراجل كان
باين في عنيه الذعر والخوف .. القهر والمرض .. قعدته وقعدت جنبه
وقلتله : أنا آسفلك بالنيابة عن كل الناس دي .. بجد آسفه .. إنتوا
بتعملوا مهمة خطيرة مع شعب فيه اللي معندوش وعي .. وممكن يقتل
غيره بدون ما يقصد .. أنا حاسس بيك وعارف إننا نسينا خالص إن
إنت واللي زيك من اللي بيعرقوا عشان نحس بنضافتنا ليكوا مشاعر
وبتخافوا .. آنا آسفه الناس نسيت إنكوا بشر وعندكوا بيوت وعيال
قالي : يا أبنتي أنا سايبها على ربنا والله .. بس انا بخاف ..من يومين
سمعت إن زميل لينا جاله المرض ومات من الحاجات اللي بنلمها دي ..
بنتي دخلت عليا وانا بعيط وقالتلي يابا متنزلش واقعد معانا .. نجوع
ونموت كلنا من الجوع على الاقل هناخد وقت على ما نموت أحسن ما
المرض والموت ياخدك مننا .. قلتلها يا بنتي انا معنديش اني اقعد
اختار .. انا قلبي حديد متخافيش … بس بيني وبينك أنا خايف
حاولت اساعده ماديا مرضيش بس وصاني والله وصية .. قالي أكيد
إنتي ليكي في النت وكده .. قالهالي وهو بيعيط وربي .. قولهم
ميرموش الحاجات دي كده .. يحطوها في أكياس ويقفلوها .. وأنا
مستعد ابوس الجزم والله .. وبلاش تترمي في الشارع كمان لاني هبقى
مجبر ألمها .. ولو معملتش ده هقعد في بيتنا .. قولهم يرحموني
ويرحموا عيالي .. ويخلوني بس اقف على رجلي حبة السنين اللي
فاضلين على ما أجوز العيال
وإنفجر في العياط وسابني ومشي
رسالة لكل الناس من هذا العامل البسيط ارحموا من في الأرض
يرحمكم من في السماوات والأرض..
