سد النهضة بقلم الإعلامي/ يوحنا عزمي

64

شخصيا مستمتع جدا بكل الهبد والهري اللي بتعمله أثيوبيا

وعايزها تجيب أخرها أو ما بعد أخرها بمترين ، يعني تعدي البراميل ، وعاجبني جدا الدبلوماسية المصرية وتستيف الأوراق في مجلس الأمن والأمم المتحده ، عشان لما تيجي اللحظه تبقى ضربة بالمرزبة مش 100 بالشاكوش ، ونقفل الملف ده خالص لأنه مفتوح علينا من 50 سنه ولو ماتقفلش هيبقى ورقة لوي دراع للأجيال اللي جاية ، واللي خطط

واللي دبر هيتقفل الملف كله على صباعة لو خلصت الحكاية بضربة مرزبة .. 

مصر هتعمل ايه بقى ؟

ماعرفش بس عندي توقع أو اعتقاد مبني على خطوات مصر في السنين اللي فاتت ، اعتقادي بيقول إن أي عمل عسكري لازم يرتبط بإثبات الضرر ، يعني تثبت بس إن ماية النيل بتاعتك نقصت نقطة بسبب سد النهضة ، وده اللي خلى مصر ماتفكرش في أي عمل عسكري في السنين اللي فاتت وده لسببين ، أولا ظروفنا في 2013 و 2014 الاقتصادية

والسياسية مكانتش تسمح ..

ثانيا أي عمل عسكري كان هيبقى مجرد ضرب لقواعد السد اللي هي ملهاش أي تلاتين لازمه وسهل تعوضها أثيوبيا واحنا مأثبتناش ضرر واقع علينا ، وطبعا وقتها أثيوبيا هيقولوا ضربونا واحنا طيبين ، ده احنا كنا ناويين منأثرش أبدا على حصة مصر ، ده احنا كنا مادين إيدينا للتفاوض وموافقين على كل الشروط ، وأمريكا وقتها معروف كويس أوي هتعمل ايه ، فـ حكاية ضرب السد في 13 و 14 كان هيبقى فخ وخسارته فادحه ومكسبه صفر .. 

اعتقادي برضه إنه وقت إثبات الضرر علينا هيصاحبة حاجتين ، أولا اعلان رسمي من وزارة الخارجية يوُدع في مجلس الأمن بيشمل على ديباجه تشرح اللي حصل كله

وينتهى بجملة إننا انتهينا من التفاوض وتم تسليم الملف للقوات المسلحة المصرية ، وفي نفس الوقت بيان من المجلس الأعلى للقوات المسلحة بيقول بعد ديباجه طويله برضه وحرصنا على العلاقات بين الشعبين واستنفاذنا لكل أساليب التفاوض إنه يرجى من جميع العاملين والمدنيين إخلاء منطقة السد ومحيطها حفاظاً على أرواحهم ويتحدد توقيت لكده .. 

اعتقادي إن مصر لو اضطرت لعملية عسكريه فهتكون عملية في النور وقدام العالم كله ، مش في الضلمه ولا عمل مخابراتي ، وممكن تكون دي أمنيتي مش اعتقادي مهما كانت التكلفة إنما لأسباب كتير ، الخساير الوقتيه مهما كانت هتبقى ولا حاجه جنب مكاسب المستقبل .