صباحك زين

سحر أبوالعلا

صباحك زين

صباح نيلك بيضحك لك

و مراكب راسية ع الشطين ..بتنده لك

يا حلوة يلا اصحي و اسعي ع رزقك

و ناس م الفجر صاحية تصلي ركعتين

و تقول يارب بارك ببركة الحسين

و ارزق يارب دايما الناس الشقيانين

و خفف يارب عنهم آلام الموجوعين

صباحك ناس بتسعى ع الرزق و مش عارفين

الدنيا هتضحك امتى و ادينا مستنيين

بندعي نقول يارب و كلنا عشمانين

تزورنا الفرحة من تاني بعد فرقة سنين.

صباحك زين.

______________

سحر أبوالعلا

#السلطانة