((صرخة حق))

بقلم د/محمد المهدي

لمن يهمه الامر

علي لسان مواطن مصري بسيط في منطقة منشية الصدر

يقول…….

أنا دلوقتي واحد اتدمرت حياته حرفيا نتيجة خطأ من موظف في

محافظة القاهرة علشان الباشا يخلص شغله بسرعه

أنا مالك عقار ب 7 ش يوسف جاد الله منشية الصدر تم هدمه بواسطة

الحي و المحافظة بدون الاطلاع علي أي قرار إزالة نهائيا بحجة إنه

بغرض توسعه طريق محور روكسي رمسيس مع العلم إنه يبعد عن

الطريق بي 250 متر.

ومع ذلك إحنا معترضناش و قولنا تمام علشان خاطر دة للمصلحة

العامة.

لما كنا بنتكلم مع حد من المسؤولين كان بيقول إنها قرارات سياديه

خارجه من رئاسة الجمهورية و المكتب الفني للهيئة الهندسية للقوات

المسلحة فقولنا خلاص مينفعش نعترض ولا نقول حاجه.

فؤجنا اليوم 3 مايو 2020 إن في قيادات من الجيش جت منطقة

منشية الصدر تتابع التطورات إلي حصلت و تشوف الموضوع علي

الطبيعة و تشوف البيوت إلي اتهدت.

إلا إن حد من قيادات الهيئة الهندسية اعترض اعتراض شديد اللهجة

علي موظفين و مسؤولين حي الوايلي علي خطأ التنفيذ في إزالة 3

منازل لم يتم ذكرهم في الخطة من الاساس ولا تم الإشارة ليهم من

قريب أو من بعيد ومنهم بيتي 7 ش يوسف جاد الله منشية الصدر.

هل دة يرضي ربنا ؟ هل إلي حصل دة مين يتحمل عواقبه غير

المواطن .

موظف أخطأ شرد 4 أسر كاملة فيهم ناس كبيرة ملاك العقار مش

مستاجرين حتي يتشردو بالطريقة دي.

مين يتحمل نتيجة الخطأ دة و أوجه سؤالي لمين غير لربنا .