عارف إني مش بهون عليكي

بقلم/لميس سعد

أجمل كلمة ممكن تسمعها في الوجود…هما خمس كلمات.. مجموعة حروف..لكن معناهم كبير جدًا..وصداهم مش بس بيمس القلب…بيمس كل كيانك وروحك ووجدانك..

عارف إني مش بهون عليكي.

لما يحصل موقف بين أم وإبنها ومع ذلك في موقف تاني علي طول الأم بتراضي إبنها..أجمل كلمة بيقولها عارف إني مش بهون عليكي وعارف إنك نبع الحنان..الكلمة دي معناها إن الطفل حاسس إنه مهما حصل ومهما عمل مامته دائمًا معاه.

 عارف إني مش بهون عليكي.

لما تتقال من حد قريب منك حصل مابينكم زعل أو خصام أو حتي فضفضة وعتاب ويقولك الكلمة دي..ده له معني كبير آوي عشم وحب وعشرة وزي مابنقول عيش وملح وعتاب في لحظة..وعلشان كل حاجه حلوة ..عارف إني مش بهون عليكي وإنك دائمًا جنبي ومعايا.

عارف إني مش بهون عليكي.

أجمل إحساس بالأمان والإطمئنان والإحتواء..أجمل معني للحب والإخلاص والوفاء.. أجمل معني للرحمة وللحنان..أجمل شعور بالسكينة والإستقرار لما تكون عارف وواثق ومتأكد إنك عمرك ماتهون علي إنسان وإنه عمره مايخذلك وإنه عمره مايقسي عليك ولا يفرط فيك ولايكسر بخاطرك ولا يجرحك ولا يعمل حاجه تزعلك أو تقلل من قيمتك..مش علشان مايقدرش يعمل ده.. لأ هو ممكن  يعمل  ده..بس هو مراعي إنك مش هتهون عليه وإنك عنده حاجه كبيرة مافيش أي حد تاني يقدر يأخد مكانك وإنه عارف وواثق إنك مش هتهون عليه..والأجمل إنك تكون واثق ومتأكد إنك عمرك ماهتهون عليه.

عارف إني مش بهون عليك.

لما بقولها لربنا بقولهاوكلي ثقة في الله إنه مش هيخزلني ولا هيكسرني وإنه سندي وإنه وكيلي ونصيري وإنه عالم بحالي وإني لايمكن ههون علي ربي إنه يشوفني حزينة أو موجوعة..بقولها وكلي ثقة في الله إنه دائمًا معايا وإن مهما يحصل هو أرحم بيا وإني مسلمة آمري كله ليه..لإني عارفه إن ربنا هو إللي خلقني..يبقي إزاي وحاشا لله ههون عليه.

عارف إني مش بهون عليك.

لما تكون متأكد وواثق ومسلم بإنك عمرك ماهتهون علي ربك.. يبقي إزاي تقلق أو حتي تفكر سيب آمرك كله للي خلقك وفوض آمرك كله لربك وكن علي يقين إنك عمرك ماهتهون عليه..وكن واثق إن ربك هو إللي بيحرسك ويصونك وإنه وكيلك في كل شئ..ساعتها بس هتعرف بجد أجمل إحساس لكلمة

عارف إني مش بهون عليك.