عتاب البيبى لمامته دكتورة فاطمه محمود

13

البيبى :ليه كل الجيران يعرفوا إني مسهرك طول الليل .. ليه الفضايح دي ؟؟!!
أولاً أنا بأنزل من بطنك مش عارف ليل من نهار و ده لإن ساعتي البيولوجية لسه مش شغاله .. كمان المواد اللي جسمي بيفرزها علشان أنام بيبقى إفرازها غير منتظم … و كل دا بيبدأ يتظبط عند الشهر السادس و بشوية تنظيم منك بإنك تهدي الجو بالليل و تضلمي الحجرة و تساعديني أنام … هاعرف الليل من النهار و أنام ذي الناس …. بس لو ماعملتش كده إستحمليني انا إبنك برده و واجب عليكى.
البيبى : السؤال التانى إللى هايجننى
مغرقاني بودرة تلك و برفانات ليه .؟!

أنا أصلاً من غير حاجة ريحتي حلوة لإن معنديش غُدد عرقية زيكم إنتم الكبار .. غير إن بودرة التلك بأي نوع ممكن على المدى الطويل تسببلي حساسية على صدري و البرفانات الكتير ممكن تسببلي حساسية جيوب أنفيه.. من فضلك كفاية الشاور و هدومي تكون نظيفة غير كده أنا مش محتاج حاجه

البيبى: السؤال الثالث يا أمي …

بتشيلي إيدي من فمى ليه …. بتضايقيني ليه …. أنا ضايقتك في حاجه يا ياحبيبتي ؟!
أقوى خلايا حسية عندي و أنا صغير بتكون في الفم و بتكون أقوى كمان من الخلايا اللي في أطرافي … علشان كده باستخدم فمي في الإستكشاف و كل حاجه هحطها في بقي لِعب … إيدي … رجلي …أنا حر يا امى . ..
مطلوب منك بس تبعدي عني الحاجات الصغيرة علشان ما تسببليش إختناق لا قدر الله …لو إستمريت في مص صوابعي لبعد ٣ سنوات إبقى إبدأي دوري على حل … أعتقد مفيش أسهل من كده

البيبى :والسؤال ياماما يا مجنناني

مِش بتقصي ضوافري بإنتظام ليه …. هاه …. ليه ؟؟
يا مامتي يا حبيبتي أنا ضوافري بتطول أسرع منكم إنتم الكبار بمعدل الضعف يعني ضافرك لو بيحتاج يطول في إسبوع بيطول عندي في ٣ أيام بس لإن التمثيل الغذائي عندي أسرع فياريت تخلي بالك من النقطة دي لإني خربشت وشي و بقى شكلي وحش شوارع يعنى.

البيبى :المعلومه لمامتى الحبيبة
لازم تعرفى إني بنزل مياه من فمى و مفاصلي بتطقطق ده طبيعى
أنا( بريّل) ريقى بينزل على طول علشان جهازي العصبي لسه ما إكتملش و قدرتي على البلع لسه ضعيفة و بالتالي مش بقدر أبلع كل اللعاب و ده مش شرط يكون تسنين و لا فطريات … أنا كِده ربنا خلقني كده و مع الوقت و بعد عمر سنة الأمور بتتحسن …. اوكى يامامى

نيجي بأه للطقطقة و اللي بتبقى بسبب إن أوتاري بتتزحلق على بعضها يعني حاجه طبيعية في سني و لا هي خشونة و لا تٱكل في المفاصل دي حاجات تجيلكم إنتم الكبار

تقلقي بس لو لقيتي مِفصل الفخذ هو اللي بيطقطق تروحي بيا على دكتور عظام أطفال يطمنك إني معنديش خلع في مفصل الفخذ … بعد الشر عليا طبعاً

البيبى :تعالي هنا ….جوبتي على أي سؤال من اللي فاتوا و الا شاطرة بس تشتكي مني في كل المواقع والسوشيال الميديا… مش كده يا مامى برستيجي إتبعثر خالص ..
دكتوره فاطمه محمود