479 شارك ضحكتني يخربيت فقرك دا كلام يتقال ؟! هي الصحوبية يا واد تنفع من غير ناس فوق الراس تتشال ؟! تبقالك طاقة نور وسرور وعبور لطريق لو فيه أهوال الصحبة الحلوة يا واد مش ناس ماليين يومنا بدون أي أساس الصحبة ما هياش قعدة لطيفة ورص كلام من غير إحساس ولا قص ولزق بشر حواليك واما بتحتاجهم يبقوا خيال الصحبة عيون بتشوف بعنيك وايدين بتساعدك قبل ايديك الصحبة قلوب بتسمي عليك وف ظهرك لما يضيق الحال الصحبة ساعة حيرتك اجابات من قبل ما تطرح أي سؤال صاحبي اللي بجد يقدرني وما يرضاش حد هزار أو جد ف وقت العك يصدرني ولا سيرتي تجيش وسط الألاضيش على في وما فيش ويجرجرني ويسيبني ف حَت ولَت وفَت وقالوا وعادوا ومية موال الأصحاب دم يا واد مش كم يشيلوا حمولك وقت الفرح ووقت الهم بدون إشكال مش جاي تقولي حصلي وكان ودا عادلي وزادلي ونقصني ودا أصله جبان ودا واد تعبان ودا مستغفلني وقرطسني ودا أصله يمين ودا أصله شمال أما عجايب ! طاب واللهِ عال !! ما تغور الصحبة لدي الأشكال يا شيخ اسكت بقى ما تعصبنيش هي دي صحوبية ؟! دا لعب عيال ! قال أصحاب قال !! قال أصحاب قال بقلم مصطفى المصري 479 شارك
