قطفة من بستان الطفولة علموا أولادكم

15

متابعة .الاء مهدى

نجدد اللقاء مع تعاليم تربوية فى عالم الطفولة ومع اجمل ما قرات لعيسى المسيرى

علم طفلك من صغره 

🔸 يقول حاضر يا بابا ونعم يا ماما وميقولش لأ ولا يرفع صوته علي إخواته أو يلطم علي وجهه أو يشد في شعره.

🔸 إنه يأكل بإيده اليمين ويقول بسم الله قبل الأكل والحمد لله بعد الأكل 

ويغسل إيده قبل الأكل وبعده .

🔸 إنه يكون صادق ويقول الحق حتي علي نفسه وشجعه على الصدق علشان ربنا يحبه ويدخل الجنة وممنوع الكذب علشان الكذاب بيروح النار.

🔸لازم يبعد ويتجنب أي شئ ممكن يضره زي الأكل الساخن والنار والكلاب والقطط والأشياء الغير نظيفة والكهرباء 

🔸 يكون معطاء يعني يأخذ ويعطي من البسكويت أو أي شيء لطفل أخر أو إخواته حتي لا يصبح أناني من صغره .

🔸 أمور دينه زي الصلاة والوضوء والقرآن وطاعة الله وحب ربنا والرسول والناس كلهم

🔸 الفرق بين الولد والبنت في اللعب واللبس والنواحي الجنسيه علشان الأطفال بيقلدوا بعضهم دون معرفة ومينفعش يناموا مع بعض

🔸النظام يعني يرمي الورقة في سلة الزباله ولا يرميها علي الأرض أو الشارع ولما يخلص لعب يرجع اللعب مكانها تاني 

🔸 ممنوع يشتم حد أو يبصق علي أحد أو يقبله من فمه أو يأخذ حاجه من شخص غريب أو يأكلها بدون موافقة منك أو أمه .

🔸 يعرف أهله يعني مين عمه أو خاله أو إبن عمه أو خاله وخالته ويحبهم ويعيد عليهم .

🔸 يحافظ على نظافة البيت والملابس والأحذيةوغسيل أسنانه.

🔸 الأدب في الكلام : يعني مينفعش ينادي على أحد بإسمه المجرد ويقول لو سمحت يا عموا عايز كذا ولما أحد يعطيه حاجة يقوله شكرا يا عمو ولما حد يشتمه يقوله الله يسامحك.

🔸 يعتمد على نفسه : يعني إزاي يلبس ويأكل ويشرب وينظف حاجته بنفسه ويلبس حذائه بنفسه 

🔸 الكرم : يعطي من اللي معاه بدون مقابل حتي لو جزء صغير من البسكويت أو أي شيء

🔸 تنمية مهاراته .

🔸 لا يضرب أحد ولا يعتدي على أخرين ويدافع عن نفسه ويحافظ على ما يملك من مال أو أكل .

🔸إنه يكون إيجابي يعني لو شاف حجر في الطريق هيؤذي الناس يرفعه علي جنب ولما يشوف حد بيعمل حاجه خطأ يقوله ده خطأ 

ولو شاف قطه جائعه يطعمها بعض الطعام

🔸 لا يصاحب صديق السوء ويبتعد عنه

🔸يقول رأيه بأدب وإحترام

🔸 يستخدم الأشياء الشخصية مثل فرشاة الأسنان ولا يستخدم أشياء إخواته الشخصية

🔸 (لا ضرر ولا ضرار) يعني من حقه يلعب ولكن بشرط ألا يزعج أحد ولا يكسر الأشياء

🔸القدوه الحسنه وحسن إختيار أصحابهم

🔸 لازم يعرف تقاليدنا وعاداتنا الصحيحه مثل أن يقف للكبير ويسلم علي جده وجدته ويقبل أيديهم عند رؤيتهم 

🔸 يحب الرسول ويحب ربنا ويسمع كلام ربنا ويحب الناس كلهم والجيران والأصدقاء ويتمنى لهم الخير ويقول الحمدلله علي نعم ربنا عليه ويشكر الله ويدعي ربنا إنه يوفقه وينجح ويكون من الأوائل .