لبنان وطن مصلوب فوق حائط الأطماع

79

بقلم الإعلامي/ يوحنا عزمي

لبنان وطن مصلوب فوق حائط الأطماع ، وديكتاتورية تعدد الأحزاب والطوائف تقود لبنان إلى الفراغ ..
بعد ما سعد الحريري أعلن تنحية عن تشكيل الحكومة المظاهرات بتتواصل والانهيار الاقتصادي ، الدولار تجاوز حاجز 22
ألف ليرة ، من سنتين تلاته كان ب 1500 ليره يعني الزيادة 15 ضعف ، مش 15 % ، لأ 15 ضعف يعني 1500 % متخيل حضرتك شكل الأسعار دلوقتي ..
ماعرفش مشكلة لبنان فين بالظبط ؟
ساسة فاسدين ، تدخل أجنبي من كل من هب ودب ، إنما عندي سؤال لأهلنا في لبنان 4 دول تدخلت فيها إيران بنفس السيناريو وعملت ميلشيات تابعه لها ، العراق ولبنان واليمن
وسوريا ، ايه رأيكم ؟
هل الإيرانيين حررو القدس ونيمو إسرائيل من المغرب ؟
هل وجدتم ما وعدكم الملالي حقاً ؟
طيب الإيرانيين حلو مشاكل الدول دي ، ولا الخراب في رجليهم أينما حلّو ؟ زيهم زي الأمريكان والأتراك والروس
والبريطانيين والفرنسيين .
الحقيقه في وسط الأزمة وقفني خبر شوفته شديد الإنحطاط الخبر عن حزب الله إنه أعاد نشر صور لاتنين جنود إسرائيليين أسروهم في 2006 يعني لبنان في معجنة
وانهيار اقتصادي ومش لاقيين اكل ولا دواء ، وحزب الله يعيد نشر الخبر ده ، اللي هو كسبنا صلاة النبي ، مش عارفين من غير الخبر ده كنا هنعمل ايه والله ، فلو حضرتك أب لبناني ومش لاقي علبة لبن لابنك الرضيع مفيش مشكلة ابقى طلع صورة الاتنين جنود بتاع 2006 وبص فيها هترجع البيت تلاقي ابنك جنب منه كرتونة لبن أطفال.
والحقيقة برضه إنه مش لبنان بس ، العرب كلهم لازم يفوقوا من الغيبوبة ، الشعوب أهم من الحكام ، فساد الحكام مقدور عليه لو فيه شعوب عندها وعي ، مش مره ينضحك على الشعوب بأسم الديموقراطية الأمريكاني ومره بأسم الدولة الإسلاميه ومره بأسم الخلافة ، ماينفعش تنضرب على قفاك 17 قلم وتقول انا انضربت على سهوه .
يا شعوب العرب باختصار شديد ونداء أخير ، فوقو واطردو كل القوى الأجنبية الإستعمارية من بلادكم ، أو احفرو قبوركم بإيديكم وموتو بهدوء ، وهنبقى نكتب علي القبر “هنا ترقد شعوب كانت عايشه في ماية اللفت” .