المقالات والسياسه والادب
لحظة وعي كتبت/د/شيماء صبحى
في زحمة الحياة، لما كل حاجه حواليك بتجري، ومفيش وقت حتى تفهم نفسك… بييجي وقت، تحس فيه إنك مخنوق، متلخبط، مش عارف إنت مين ولا عايز إيه. وقت تحس فيه إنك تايه، رغم إنك واقف في نفس المكان اللي كنت فيه من سنين. ساعتها بتبقى محتاج حاجه واحده بس: مساحه هاديه.
أيوه… مساحة هادية.
مش مكان بعيد، ولا سفر لأخر الدنيا… لأ، دي مساحة جواك. ركن صغير كده في قلبك، بتقعد فيه مع نفسك، تسأل، وتسمع، وتفهم، وتستوعب.
المساحة دي مش رفاهية، ولا كسل، ولا دلع. المساحة دي نجاة. لأنك في اللحظة اللي بتبعد فيها عن دوشة الناس، وصوت التوقعات، ونظرات اللوم، والطلبات اللي مبتخلصش… وتبدأ تسمع صوتك إنت… ساعتها بس، بتعرف تبدأ ترجع لنفسك.
التأمل مش للناس الروحانيين بس
التأمل مش بس قعدة بودا على صخرة، ولا مزيكا هادية في ضهر جبل. التأمل هو لما تقفل موبايلك، وتكتم صوت العالم، وتقعد في مكان مريح وتقول لنفسك:
“أنا حاسس بإيه؟”، “أنا تايه ليه؟”، “هو أنا أصلاً عايز إيه من حياتي؟”
ساعات تلاقي إجابات، وساعات لأ. بس مجرد إنك سألت… ده بداية التغيير. لأن كل حاجة حلوة في الدنيا بتبدأ من لحظة وعي.
الإلهام مش بييجي وإنت بتجري
إحنا مش بنلحق نلهم نفسنا، ولا نسمع أفكارنا، ولا نحلم. ليه؟ عشان دماغنا طول الوقت شغالة على الرد، والهروب، والمقارنة، والقلق، والضغط، والخوف.
بس لما تهدى، ولما تسكت الضوضاء، هتتفاجئ قد إيه عندك أفكار حلوة، وخيال واسع، وذكريات محتاج تفهمها، وقرارات كان لازم تاخدها من زمان.
مساحة اكتشاف الذات
إنت ممكن تكون عايش مع نفسك بقالك ٣٠ سنة ومتعرفهاش.
إيه اللي يفرحك؟ إيه اللي بيخوفك؟
بتغير ليه قدام الناس؟
ليه بتحب حد بيأذيك؟
ليه بتجري من علاقات، أو بتتعلق بأول كلمة حلوة؟
كل الأسئلة دي مش هتلاقي لها إجابة من كتاب أو فيلم…
هتلاقيها جواك.
بس لازم تقعد مع نفسك.
خطوات بسيطة تبدأ بيها المساحة الهادية دي:
افصل من كل حاجة ١٠ دقايق في اليوم
اقعد في مكان مريح، من غير موبايل
اسأل نفسك سؤال بسيط: “أنا مبسوط؟”
اكتب مشاعرك، حتى لو طلعت متلخبطة
متخافش من اللي هتلاقيه جواك، اتقبله
سامح نفسك، وابدأ تاني
ليه المساحة دي مهمة؟
عشان الحياة أسرع من إننا نستنى حد يفهمنا
وأقسى من إننا نفضل نكمل متكسرين
وأجمل من إننا نعيشها وإحنا مش فاهمين نفسنا
خد لحظة وعي…
لحظة تكون فيها حقيقي
مش مطلوب، مش خايف، مش متخفي
لحظة تسمع فيها جواك قبل ما تسمع اللي بره
لحظة تقرر فيها…
إنك تستحق تعيش حياة تشبهك
مش حياة اتفرضت عليك
لأن التغيير الحقيقي؟
بيبدأ من جواك
