لم القلب يفضل طفل صغير ؟! عن ضعف النضج العاطفي
“لم القلب يفضل طفل صغير… ؟!
عن ضعف النضج العاطفي”
كتبت/ د/شيماء صبحي
في ناس شكلهم كبار، عندهم شغل، و مسئوليات، بيت.. بس أول ما تدخل جواهم تلاقي طفل صغير لسه مستني يتطبطب عليه، يزعل بسرعة، يتعلق بسرعة، ويغضب بسرعة أكتر.
ده مش حب ولا طيبة زيادة، دي علامة من علامات ضعف النضج العاطفي.
يعني إيه ضعف النضج العاطفي؟
يعني الشخص مش قادر يدير مشاعره بطريقة صحيّة، لا بيعرف يعبر عنها صح، ولا يعرف يتعامل معاها من غير ما تغرقه.
تلاقيه لو زعل يختفي، ولو حب يتمسك لحد الخنقة، ولو خاف يبعد من غير ما يقول ليه.
هو مش وحش، بس لسه مش “ناضج عاطفيًا”… لسه ما تعلمش يوازن بين إحساسه وعقله.
التحليل النفسي للمشكلة
ضعف النضج العاطفي غالبًا بيبدأ من الطفولة…
لما الطفل ما ياخدش احتواء كفاية، أو لما بيتعلم إن التعبير عن المشاعر غلط أو عيب، أو لما يعيش في بيت مليان توتر، بيكبر وهو مش فاهم يعني إيه يحس بأمان.
فكل ما يكبر، يفضل يدور على “الدفا المفقود” ده في أي علاقة…
وده يخليه يا يتمسك بالشخص التاني أكتر من اللازم، يا يهرب أول ما يحس بالخطر أو الرفض.
جواه دايمًا طفل خاف يتأذى، فإما يهاجم أو يهرب، ومش بيعرف يعيش توازن بين الاتنين.
تلاقيه دايمًا بين طرفين:
يا إما “أنا مش محتاج حد”
يا إما “ماعرفش أعيش من غيرك”.
مظاهر ضعف النضج العاطفي
بيغضب بسرعه ويتكتم أو ينفجر.
بيبالغ في ردود أفعاله.
مش بياخد مسئولية عن تصرفاته (يقول دايمًا “هو السبب”).
بيخاف من المواجهة أو من الرفض.
بيحاول يغيّر التاني بدل ما يشتغل على نفسه.
صعب يعترف إنه غلط.
دايمًا مستني اهتمام، وما بيعرفش يديه لنفسه.
النتيجة؟
العلاقات دي بتبقى مرهقة.
شخص متعلق، وشخص تايه.
دايمًا في سوء فهم، دايمًا في وجع، ودايمًا في مشاعر ملخبطة بين الحب والاحتياج والخوف.
وفي الآخر الكل بيتعب… لأن العلاقة لما تكون مبنية على “نقص”، مش هتدّي “اكتفاء”.
الحل والخطوات العملية
1. اعترف إن عندك مشكلة: أول طريق العلاج إنك تعترف إنك محتاج تتغير، مش الناس اللي حواليك.
2. افهم نفسك: اسأل نفسك لما بتزعل أو تتعلق… إيه اللي بيحركك؟ خوف؟ احتياج؟ نقص؟
3. ابدأ تتعامل مع مشاعرك بوعي: قبل ما تتصرف، خُد نفس واسأل نفسك “أنا فعلاً حاسس بإيه؟ وعايز إيه بالظبط؟”.
4. اتعلم تقول لأ: لأنك لما بتعرف تحط حدود، بتبدأ تنضج.
5. ابعد عن الدراما: مش كل مشكله لازم فيها دموع وصدام، في حاجات تتحل بالهدوء.
6. اشتغل على الطفل الداخلي: كلنا جوانا طفل صغير محتاج حب واهتمام، دور على احتياجاته وابدأ تلبيها بنفسك.
7. خد وقتك قبل أي ارتباط: النضج مش معناه تبعد عن الحب، بس يعني تختار من غير خوف، وتحب من غير تمسك.
في الآخر:
النضج العاطفي مش إنك تبقى جامد ومفيش حاجه تأثر فيك…
النضج الحقيقي إنك تحس بكل حاجه، بس من غير ما تسيبها تكسرك.
إنك تحب من غير ما تتعلق، وتسامح من غير ما تضعف، وتختار نفسك من غير تأنيب ضمير.
