ما تغيرش نفسك علشان حد

ما تغيرش نفسك علشان حد

كتبت/د/ شيماء صبحي 

في ناس كتير أول ما تدخل علاقة أو أول ما يعجبوا بحد، يبتدوا يغيروا من نفسهم علشان يرضوا التاني.

واحد يغير لبسه، واحد يغير ضحكته، واحد يغير طريقة كلامه، وواحدة تسيب شغل بتحبه أو أصحابها علشان يفضل راضي عنها.

واللي مش واخدين بالهم منه إن التنازل ده مش بيزود الحب، بالعكس، بيخليك تخسر نفسك بالتدريج.

أجمل حاجه فيك إنك تكون “إنت”، بعيوبك، بمميزاتك، بطريقة ضحكتك العفوية، وحتى بغبائك في مواقف معينة.

اللي عايزك هيحبك كده، مش هيطلب منك تلبس قناع وتعيش عمرك كله في دور مش دورك.

وصدقني، أصعب حاجة في الدنيا إنك تعيش عمرك كله بتجامل وبتحاول ترضي، وفي الآخر اللي قدامك برضه مش هيتبسط، لإنه أصلاً مش عايزك، هو عايز الصورة اللي رسمها في دماغه.

الموضوع هنا مش عناد، ولا قسوة، الموضوع إنك لازم تحافظ على هويتك.

الشخص اللي بيحبك بجد مش هيقولك “غيّر”، هيقولك “أنا قابل بيك كده”.

ولو لقيت نفسك مضطر تتغير عشان يستمر، يبقى العلاقة دي مش مناسبة ليك من الأساس.

أنت مش محتاج تبقى نسخة من حد ولا تنفصل عن نفسك.

خليك طبيعي، خليك صادق، خليك على سجيتك.

اللي يستحقك هيفرح بيك زي ما إنت، واللي مش عاجبه الباب يفوّت جمل.

طيب تعمل إيه وتحافظ على نفسك؟

1. اعرف قيمتك:

قبل أي علاقة، اسأل نفسك: “أنا مين؟ إيه اللي بحبه؟ إيه اللي بيميزني؟”.

لو أنت مش عارف قيمتك، أي حد هييجي يحددها لك.

2. ارفض الضغط:

لو حد بيطلب منك تغيّر حاجات جوهرية في شخصيتك، قول لأ بمنتهى الهدوء.

اللي بيحبك مش هيضغطك، اللي بيضغطك مش بيحبك.

3. خلي عندك حدود:

ما تسمحش لحد يتعدى على خصوصيتك، أو يحسسك إنك قليل.

العلاقات الصحية كلها احترام.

4. متضحكش على نفسك:

لو حسيت إنك بتتنازل كتير وبتتغير عشان تمشي العلاقة، قف وقف نفسك فورًا.

الإنكار بيأذيك أكتر من الحقيقة.

5. عيش حقيقتك:

اتكلم بطريقتك، البس اللي يريحك، اختار شغلك وصحابك بإيدك.

ده مش أنانية، ده حفاظ على شخصيتك.

6. راجع نفسك باستمرار:

اسأل نفسك كل فترة: “أنا لسه أنا؟ ولا بضيع في إرضاء الناس؟”.

في الآخر، افتكر دايمًا:

اللي بيغير نفس

ه عشان يرضي الناس، بيفقد نفسه ومش بيرضي حد.