مسلسل أحمس والأخطاء الدرامية

68

كتب/الإعلامي يوحنا عزمي

تجنبت التعليق على مايخص مسلسل أحمس رغم كل الأخطاء الكارثيه ، يمكن تجنبت التعليق باعتبار إنه العمل تم خلاص وانتهى واتصرف علية عشرات الملايين ، لكن فرحت جدا لما قريت خبر وقف المسلسل النهاردة ومراجعته حتى لو وصل الأمر إنه مايتعرضش في رمضان الحالي ..

بصوا بقي عشان الموضوع ده شديد الخطورة وفيه كلام كتير هحاول أختصره .

– هي الدراما والسينما حاجه مهمة ؟
مهمة للغاية يافندم ، وجدان بيتشكل وتاريخ بيتنسخ في العقول لو عملت الحاجة صح، بناء الإنسان نفسه أهم عنصر فيه هو الدراما والسينما .

– طب احنا عندنا مواهب في الكتابه والاخراج والتمثيل
وخلافه ؟ عندنا اللي مش عند حد في الكون ، دي قناعتي
ويقيني .

– طب الاختيارات عندنا بتكون على أساس موهبه وكفاءة ؟ لا خالص ، مصالح وعلاقات مشبوهه وغير مشبوهه
وصداقات وهبل و بلى أزرق .

– طب هي مشكلتنا المصالح والعلاقات بس ؟
لا عندنا مشكلة أهم ..

– ايه هي المشكلة الأهم ؟
هي إتقان العمل ، المجهود ، و ده الفرق بينا وبين أمريكا مثلا ، مش فرق امكانيات ولا تكنولوجيا ، الفرق اسمه إنك تعرق وتتعب عشان العمل يطلع بشكل لائق ، انك تتعب وتبحث عن معلومات الشخصية اللي بتقوم بدورها وتاريخها بالكامل ، العمل الفني زي الأرض السمرة كده ، على قد ما ترعاها وتعزقها وترويها على قد ما هتديك محصول ، أم كلثوم كان عمرها 70 سنه وصلت من المجد والثراء اللي ماوصلوش نص حكام الكوكب ومع ذلك كانت تستمر في بذل نفس المجهود في اختيار الكلمات واللحن وعمل عشرات البروفات كأنها مطربة مبتدئه ، ده اللي خلى فيه اسطورة اسمها أم كلثوم .

– أفلام كتير ومسلسلات عملناها من 50 و 70 سنه ولسه بنتفرج عليها وننبهر ونستمتع ليه ؟ عشان اتبذل فيها مجهود ناس عرقت ، ناس مدركة لقيمة وخطورة رسالة اسمها الفن
واختيارات تمت على أسس الكفاءه والموهبة .

– يعني ايه تبذل مجهود في عمل درامي ؟
يعني في الكتابه تبحث وتدور وتدرس وتقرا ، وفي الإخراج نفس الشئ والتمثيل والتصوير وخلافه ، ماتجيبش واحد ممثل قاعد طول الوقت في تراس شقته في الزمالك وتقوله تعالى بقى عشان تلعب دور الملك أحمس ، الممثل نفسه قبل مايجيلك لازم يعرف مين الملك احمس ، يروح يسال عليه كتير، يمشي لحد المعابد ، يزحف لحد علماء التاريخ ويسألهم .

– طب المقابل لبذل المجهود الضخم بيكون ايه ؟
بيكون سلق بيض ، نظام ساندوتشات ، تيك أواي
صور يا عم ، برافو يا نجم ، اطبع ، نزل السوق ، عك
وليس كله كويس .

– أيوه يعني من الأخر نقدر نعمل أعمال درامية عن ملوكنا
وأجدادنا العظماء وتاريخنا العريق بشكل يليق؟
أه نقدر ونقدر نعمل عشرات الأعمال المنوعة وعندنا المواهب يتعبوا في البحث عن تاريخ الشخصيات اللي بيقوموا بتجسيدها ، بشرط إنك تحقق الشرطين دول ، الإختيار والمجهود .