معركتك مع قلبك

كتبت/د/ شيماء صبحي 

فيه معارك في الحياه بتخلص في ساعات، وفيه معارك بتاخد شهور وسنين، لكن أصعب وأطول معركه في العمر كله… هي معركتك مع قلبك.

القلب ده ساعات بيبقى طفل عنيد، عايز اللي بيأذيه، وبيحب اللي بيوجعه، وبيشتاق للي مش فارق معاه أصلاً. تفضل تقوله “لأ”، يقوم يرد عليك “آه”، تقوله “انسى”، يقولك “مستحيل”.

المشكله مش في الحب نفسه، المشكله في إنك بتدخل حرب بين عقلك وقلبك، بين المنطق والإحساس. عقلك عارف الصح، شايف إن الطريق ده كله وجع وخساره، لكن قلبك لسه متعلق باللي كان… لسه شايف إن ممكن يتغير، ممكن يتحسن، يمكن يوم من الأيام يحس بيك.

تلاقي نفسك واقف في النص… عقلك بيشدك لبر الأمان، وقلبك بيرميك في بحر الغرق. تعيط؟ ولا تضحك على نفسك وتقول “أنا كويس”؟ ولا تكمل في دوامة المشاعر اللي مش هتنتهي؟

اللي لازم تفهمه إن معركتك مع قلبك مش معناها إنك تخسره أو تلغيه… لأ، معناها إنك تروضه. تعلمه إن مش كل إحساس لازم نعيشه، ومش كل حب لازم نكمل فيه. أوقات لازم تقول لقلبك: “اسمعني زي ما سمعتك، أنا تعبت من الوجع، وجاي أخلصك منه.”

المعركه دي بتعلمك أهم درس: إن الحياه مش كلها مشاعر، وإن الكرامه والعقل ساعات بيبقوا أهم من الحب. بتعلمك إنك لو سبت قلبك يقودك على طول، هتضيع. لكن لو خدت بإيده ووجهته، هتكتشف إنك أقوى من أي ضعف جواك.

في الآخر… كسبان ولا خسران؟ كسبان لما توقف قدام مرايتك وتقول: “أنا اخترت نفسي، أنا اللي انتصرت”. ساعتها قلبك هيبطل يتمرد، وهيتعلم يحب اللي يستاهل، ويبعد عن اللي وجع.

خطوات عمليه عشان تكسب معركتك مع قلبك:

1. اعترف بالحقيقة: متكذبش على نفسك وتقول “لسه في أمل” وانت عارف إن الأمل خلص.

2. اكتب مشاعرك: ورقه وقلم هيساعدوك تفضي كل اللي جواك بدل ما يفضل يعذبك.

3. حط حدود واضحه: ابعد عن أي تواصل أو صور أو أماكن بتفكرك بالشخص. البعد الجسدي بيساعد القلب يهدى.

4. اشتغل على نفسك: رياضه، شغل، هوايات… أي حاجه تلهي دماغك وتديك إحساس إنك بتكبر مش بتتراجع.

5. ادّي نفسك وقت: مفيش معركه بتخلص يوم وليله، الصبر هنا أهم سلاح.

6. افتح قلبك لحاجات جديده: صداقات، تجارب، معرفه… مش شرط حب تاني، بس عشان تحس إن حياتك مش واقفه على شخص واحد.

7. خليك رحيم مع نفسك: متجلدش ذاتك عشان حبيت غلط، كلنا بنغلط، لكن مش كلنا بنتعلم.