نتعلم ببساطة
نتعلم ببساطة
كتبت/د/شيماء صبحى
الوقاية مش لازم تكون تخويف ممكن تكون لعبة، سؤال، أو حكاية.
هقولكم شوية أسئلة وألعاب بسيطة نعلّم بيها أولادنا (من 3 لـ12 سنة) إزاي يحموا نفسهم من التحرش
للأطفال من ٣ لـ ٦ سنوات
التوكيدات الايجابية( نأكد على الطفل دايما إن جسمك غالى و نعمه كبيره من ربنا لازم نحافظ عليه و نحميه ، بالأكل الصحى ، النوم الجيد ، نلعب رياضة، ممنوع الضرب ، ممنوع نتكلم مع حد عنه غير ماما و بابا )
لو حد حب يحضنك وإنت مش حابب؟
قول: لأ شكراً وارفع إيدك
( و دا طبعا و انا كأم أو كأب مش بغصب أولادى أنهم يعطوا بوسه لعمه أو تنط يا حبيبي غصب عنهم )
عارف إن في اجزاء من جسمك محدش يلمسها أو يشوفها غير ماما أو الدكتور و طبعا و انا أو بابا معاك ؟
بنوضح ده برسم بسيط
( نرسم صورة و نوضح خطوط باللون الأحمر المناطق ممنوع حد يشوفها أو يلمسها و طبعا ممنوع حد يبوسني من بؤى ) أو ( نجيب عروسه لعبه و نشاور على المناطق دى )
لو حد إدّاك حلوى وقالك متقولش لماما؟
نعلّمه يقول: لازم أقول لماما الأول
( و دا طبعا لما ابنى أو بنتى مش بيخافوا منى و يحسوا بالأمان لما يحكوا لى أى حاجه من غير خوف أو سخريه منى و التصديق على كلمهم و أحساسهم )
للأطفال من ٥ لـ ٩ سنوات
الفرق بين اللمسة الحلوة واللي تخوف؟
نقول له: اللي تزعلك أو تربكك مش صح
( نجيب ورقه و قلم و نقسم الورقه نصفين نكتب ايه اللى مسموح بيه زى حضن ماما ، بابا ، تيته ، و أيه غير مسموح بيه زى ان أقعد على رجل خاله ، عمه، السواق و هكذا )
لو حد قالك ده سر بينّا؟
نفهمه إن مفيش أسرار عن ماما وبابا
( نردد دايما على الطفل احنا أكتر ناس هنحميك متخفش من أى حد يقولك هدبحك أو هضربك لو قلت السر اللى بينا )
شفت حد بيعيط علشان حد بيضايقه؟
قله: بلغ الميس أو مامته فوراً
للمراهقين من ١٠ لـ ١٢ سنة
لو حد بعتلك صورة مش مناسبة؟
نحذره ونقوله يحظر الرقم ويبلّغ
لو صاحبك عايزك تلعب لعبة غريبة؟
قوله: مش عاجباني العب حاجة تانية
عارف إن التحرش ممكن يبقى بنظرة أو بكلمة؟
نحطله تعريف بسيط ونتكلم من غير خجل
أنشطة سهلة للتوعية
لعبة الصديق الآمن
يغمض عينه ويشاور على حد يثق فيه
رسم خريطة الجسم الآمن
نلوّن الأماكن اللي محدش يلمسها
تمثيل أدوار
نلعب معاه موقف حقيقي ويتعلم يرد
نصايح مهمة للأهل
استخدموا القصص الكرتونية بدل التخويف
زي الذئب وسمسمة الطفل هيتعلم من غير ما يخاف
أكدله إنه قوي ويقدر يحمي نفسه
قوله: أنا واثق فيك
كرروا الأسئلة دي من وقت للتاني
علشان المعلومة تثبت ويبقى عنده أمان
مثال تطبيقي واقعي
لو مدرس الألعاب قالك: تعال لوحدك الفصل
قوله: لازم أجيب حد معايا أو هقول لماما
رسالة أخيرة
اللي بيتقال بلعبة أو سؤال هو اللي بيفضل في دماغ الطفل
التحرش
مش كلمة نخاف منها السكوت عليه هو الخطر الحقيقي
