هرمون الاوكسيتوسين (هرمون الحب)

55

بقلم / آلاء عادل

بيفرز هرمون الاوكسيتوسين من الغدة النخامية

• اطباء النسا والتوليد بيستخدموا الهرمون دا وقت الولادة لأنه بيزود انقباضات الرحم بقوة وبينظمها ودا بيسهل عملية الولادة وكمان بيحفز تدفق لبن الام بعد الولادة
وبيربط بين الام وابنها ويخليها تحبه وتستحمل اى الم او ضغط مع انها اول مرة تشوفه

• الهرمون دا بردو بيفرز اثناء لمس الايد او الاحتضان او التقبيل وبيخليك تحس بالحب اتجاه الشخص دا
عشان كدا دايما لمسة الايد بتحسسك بالحب ولما حد يحضنك او يبوسك بتحس بالحب

طرق بتساعد على افراز الهرمون او زيادته فالجسم :

1- ممارسة تمارين اليوجا والتأمل بتزود الاوكسيتوسين فالجسم وليها فوايد ف تقليل الضغط النفسى والقلق والتوتر وتقلبات المزاج وبتساعد على نوم افضل

2- الاغانى بتقدر تغير من مودك عن طريق الاوكسيتوسين هرمون بردو وهتلاقى ناس بتحب تصحى بدرى تسمع فيروز وتقعد تشرب قهوة وبتعمل مزاج بالحركة دى

“وانا بشوف ان القرآن بردو له تأثير افضل” ⁦

3- ارسال رسالة او تلقى رسالة بيعزز افراز هرمون الاوكسيتوسين

افتكر دايما ان *الكلمة الطيبة صدقة* وانك تقدر تسعد بيها انسان حتى لو متعرفهوش
ولو بتحب حد دايما قوله انك بتحبه او بتقدره دا هيفرق معاه جددا

4- انك تقضى وقت مع اصحابك او الناس اللى بتحبها دا بردو من الحاجات اللى بتأثر عليك
وعشان كدا دايما هتسمع نصيحة انك تقف جنب صاحبك وقت شدته اكتر من وقت الفرح لانه فى وقت شدته مفتقر احساس الحب وهنا هيعرف مين بيحبه بجد
وانك تحضن الشخص او تمسك ايده هيحسسه بالحب

5- سعات هتلاقى ناس بتعبر لحد بالحب عن طريق انها تعمله اكل او تقعد تاكل معاه وهتسمع دايما جملة دا بينا *عيش وملح* وهتبقى جملة بتعبر عن الحب والعشرة الحلوة

6- انك تشترى هدية لحد او حد يجيبلك هدية او يساعدك او تساعده فى حاجة دى بتحسسك بالحب والامتنان

7- عملوا ابحاث ودراسات على تربية الحيوانات الاليفة ولقوا انها بتساعد على الاحساس بالحب خاصةً الكلاب والقطط والطيور بالترتيب وبتأثر على الشخص والحيوان بتاعه وعشان كدا دايما هتلاقى الناس اللى بتربى حيوانات هتقولك الكلب اوفى من البشر والحيوانات الاليفة عموما
متستغربش لما تلاقى حد بيعيط علشان حيوانه مات لانه بيبقى فعلاً بيحبه.