هو الملئ الثاني لسد النهضة نجح ام فشل

58

بقلم الإعلامي/ يوحنا عزمي

الناس بتسأل والسؤال مشروع ، هو الملء التاني لسد النهضة فشل زي مابنقول ولا احنا طبالين وهجاصين والملء التاني نجح
نجاح ساحق شاكب راكب زي مابيقول المسئولين في أثيوبيا؟
سؤال بسيط ومشروع أهو ، وإجابته بأختصار إن الشيطان بيكمن في التفاصيل ، يعني ايه الكلام ده ؟ يعني التالي :
– علم الرياضيات علم مهم جدا ، مش مجرد شوية نظريات
ومعادلات بنروح ندلقهم في الإمتحان ونرجع ننساهم ، مهم ومتداخل في كل حاجه في حياتنا ، بما فيها سد النهضه .
– هندسيا بحيرة السد أشبه ماتكون بمتوازي مستطيلات
وده حجمه زي مادرسنا في إعدادي طول في عرض في ارتفاع ، طول وعرض البحيرة “متوازي المستطيلات”
ثابتين ، يبقى التغيير في حجم البحيره او حجم المياة المخزنه بيجي منين ؟ بالظبط بيجي من الإرتفاع .
– افترض مثلا إن طول البحيره 10 ألاف متر ، وعرضها ألف متر ، وارتفاعها متر واحد يبقى الحجم 10 مليون متر مكعب ماية ، لو الإرتفاع 100 متر يبقى الحجم مليار متر مكعب ماية وهكذا .
– طب احنا أصلا خبرائنا بيعرفوا المعلومات دي ويجيبوها منين ؟ بيفتحوا المندل ولا بيقروا الفنجان ؟
لا حضرتك بيجيبوها من صور الأقمار الصناعيه ، اي إرتفاع زياده بيبان وبالتالي بتقدر تحسب كمية المياة المخزنة .
– اللي حصل وبحسب صور الأقمار الصناعية ، إن الإرتفاع كان كذا متر مايعني تخزين 3 مليار متر مكعب فقط في الملء التاني ، كان المستهدف تخزين 13 مليار وده كان بيتطلب تعلية الممر الأوسط “الإرتفاع” بشكل أكبر بكتير وده ماحصلش .
– طب أبو أحمد بيقول إن الملء التاني تم بنجاح ..
هو بيستعبط ؟ .. اه حضرتك لانه يبدو ان مفيش حد هناك بيسأل عن التفاصيل ، هما عايزين يعلقوا الكهارب وخلاص طب هو الملء التاني خلص ؟.. أه خلص ، ليه خلص ؟
عشان التعليه اللي حصلت انتهت والمايه طلعت من فوقها مابقاش ينفع تعلّي تاني والمايه جايالك سيل ، لازم تستنى للسنه الجاية .
– يعني هو ماكدبش في حكاية إن الملء التاني انتهى ؟
لا ماكدبش في دي ، هو انتهى فعلا ، طب انتهى على كام ؟ على 3 مليار مش 13 هو كده نجح ولا فشل ؟
فشل تماما ، طب بالمعدل ده بتاع 5 مليار في سنه و3 مليار في سنه هيوصل للرقم المستهدف ( 74 ) في كام سنه ؟
في 15 سنه حضرتك ، طب كده مصر تتأثر ؟
لا خالص ، إحنا أصلا كان أقصى طموحاتنا ان التخزين يتم في 7 سنين مش 15 سنه .
– طب مشكلة مصر مع سد النهضة حاليا ايه لو افترضنا ان أثيوبيا هتمشي بنفس المعدل؟
مشكلة مصر كانت حاجتين عكس بعض ، إحتمالية الجفاف
واحتمالية الغرق ، وبعد المعدل الأثيوبي في الملء هنشطب على احتمالية الجفاف وتبقى مشكلتنا الحالية واحده بس وهي أمان السد واحتمالية الغرق ، اللي هي احتمالية انهياره وحتى دي عاملين حسابها ، اللي هيتاثر فيها بشكل كبير السودان مش احنا .
– اه بالمناسبه ، إثيوبيا بتبني في السد من 10 سنين ..
وارتفاع الماية عندها كان يسمح بتوليد كهربا من توربينين بس ماحصلش لأخطاء في التوربينين ولانه مفيش بنية تحتيه للكهربا هناك ، يعني الكهربا اللي هتطلع من السد مش هينقلوها في جيوبهم اكيد ، وبالتالي حضرتك ممكن تسأل هما الأثيوبيين بيعملوا حفلة ومعلقين الكهارب إزاي وهما ماعندهمش كهربا ؟.. فغالبا معلقين الكهارب بتاعتهم على لمبة جاز .