أبنى مرايتى(انا وابنى)

كتبت/د/شيماء صبحى 

مشكلات بنسمعها عن اطفال بتكذب، و بتسرق، و بتنقل كلام، و بتتجسس و بتنم و بتشتم الفاظ بذيئة و بتخرب بيوت ناس كبار، و الأطفال دي سنها لا يتعدي ال ٧ سنوات

لإنك لو سبتي طفلك للتلفزيون يربيه هيتربي

ولو سبتيه للموبايل و التيك توك و يوتيوب هيتربي

ولو سبتيه في الشارع هيتربي

ولو سبتيه للكرتون هيتربي

ولو سبتيه للمدرسة بس برضو هيتربي 

الطفل من سن سنتين ولحد ٧ سنين هو عبارة عن اسفنجة هتشرب كل حاجة في البيئة ، و حسب ما البيئة بتسمح لها او بتحذرها هتنشأ و تترعرع 

فلو احنا كأسرة مش بنكذب قدام الطفل حتي علي مديرنا في الشغل وبنقول الكذب حرام هيطلع الطفل عارف دا ..

ولو احنا مش ينقعد نتكلم علي حد مش موجود هيعرف ان النميمة مش صح و حرام نعمل كدة .

لو إحنا كأب و أم بنحترم بعض و بنحترم الناس مش بنشتم و نسب الناس و الدين و الحياه هيطلع مش بيقول الفاظ بذيئة .

ولو طلعنا بندعي ربنا و بنصلي الطفل هيعمل كدة و هيقلد دا بشكل يومي .

ولو بنسمح في البيت ان التلفزيون يعرض عنف او كلمات بذيئة او مشاهد خارجة، هيطلع يعتاد الكلمات و المشاهد دي 

ولو بنسمح لنفسنا نبص لحاجات غيرنا و نكون معتمدين بس علي المادة و الفلوس هيطلع الطفل مش مكتفي باللي معاه وعايز زيادة و ممكن يمد ايده للحرام و يسرق لإنه متعودش الإكتفاء 

وبالتالي الطفل حتي لو غلط لإنه بشر هيكون بيغلط وعارف من جواه ان اللي بيعمله مش صح بس هيبقي سهل اوي اوي نرجعه عن الغلط و نقومه ونعيده للثقافة اللي نشأ و اتربي عليها 

و هنساعده كمان يسامح نفسه و ميكررش الغلط دا و يتجنبه لإن الصح اتغرس جواه من بدري بدري 

ربي نفسك الأول علي الإيمان و الاخلاق في التعامل مع الناس و التعامل مع فلوسك و تلفزيونك و تليفونك وهيبقي سهل اوي تربي طفلك علي دا 

مينفعش نكون إحنا نفسنا في ملكوت وعايزين من طفلنا الفضيلة و الصح طول الوقت ونعاقبه لو موصلوش، لإنه ببساطة مش هيوصل لشئ لم يعتاد منك عليه 

واتكلموا مع اطفالكم عن ربنا و الإيمان و التعاملات الصحيحة قبل ما تكلموهم في سن كبير عن اهمية الصلاه و الصوم و الصح وهما اصلا معندهمش اساس هما ليه هيعملوا كدة اساسا