أقوى مـ اللي فات

أقوى مـ اللي فات

بقلم: عفاف مسلم علي

سألت روحي سؤال

والرد كان صامت

أصل الكلام وقتها

كان كله ع الساكت

عِشرة سنين تنتهي

بـ مدّ إيد الوداع

والدمعة على خدي

تايهة في بحر الضياع

تسأل لمين ولفين

واخد كياني معاك؟

مِشيت وسِبت الحنين

ينزف على ذكراك

إدّيت أنا حنيّة

ومَخدتش غير عِتاب

سايبلي نار فيّا

حسرة وشوق وغياب

لكن خلاص يا زمان

الجرح بُكرة يطيب

وهقفل البيبان

في وشّ كل غريب

أنا أقوى مـ اللي فات

وهكمل المشوار

وهسيب ورايا آهات

وأبدأ حياة بنهار

بُكرة الفرح جايّ لي

والشمس تشرق تاني

واللي كسرني في يوم

هيشوف نجاحي مكاني