أنماط الشخصية ١
أنماط الشخصية ١
بقلم د/إلهام حسنى
كل واحد فينا بيعيش حياته بطريقته وبيفكر بزاويته وبيتعامل مع الدنيا من خلال رؤيته الخاصة بالناس ساعات بتفتكر ان الاختلاف ده معناه ان حد صح وحد غلط لكن الحقيقة ان كل واحد فينا ليه نمط شخصية معين هو اللي بيحدد هو بيحب ايه وايه اللي بيريحه وايه اللي بيتعبه وايه اللي بيدايقه وازاي بيرد على المواقف اللي بتحصل قدامه
انماط الشخصية شبه البصمة مفيش اتنين زي بعض لكن في خطوط عامة بتجمع ناس شبه بعض في طريقة التفكير او الاحساس او رد الفعل لما تفهم نمطك هتعرف ليه بتتشد في مواقف معينة وليه ترتاح في مواقف تانية وليه ناس معينة تقرب منهم بسرعة وناس تانية مهما حاولت تحس ان في حاجة مش ماشية
في ناس تفكيرها عقلاني تحب التفاصيل وتحب تراجع كل خطوة الف مرة قبل ما تمشيها وفي ناس عاطفيين يعيشوا بمشاعرهم ويتأثروا بكلمة ويتعلقوا بنظرة وفي ناس اجتماعيين ياخدوا طاقتهم من الناس والكلام والضحك وفي ناس هادية تحب العزلة وتعشق الهدوء وتتقفل لما يكون في دوشة حوالين منها
المعرفة دي بتغير حياتك مش بس عشان تفهم نفسك لكن عشان تتعامل مع اللي حواليك بذكاء وتعرف كل شخص محتاج ايه وتقدره على طريقته بدل ما تجرحه بكلمة هو مش جاهز لها او تضغط عليه بفكرة مش مناسبة ليه
الانماط مش قيد
الانماط خريطة تساعدك تتصرف صح وتتعلم التوازن وتعرف ازاي تستخدم نقاط قوتك وتعدل نقاط ضعفك وتبقى نسخة احسن من نفسك يوم بعد يوم
ولو عرفنا نمط كل اللي حوالينا هنقدر نحبهم بالطريقة اللي يفهموها ونعذرهم في اللي مش قادرين عليه ونوسع قلبنا ونستوعب اختلافاتهم وطريقتهم في الحياة
بنت الحلم الكبير
