في ناس أساتذة و رؤساء أقسام كمان في أسلوب قلب الترابيزة.
يبقي هما راكبهم الغلط من ساسهم لحد راسهم وبردوا من بجاحتهم يقلبوا عليك الترابيزة ويطلعوك غلطان ومؤذي أو حساس بزيادة أو بيتهيألك أو كانوا بيهزروا وأنت إللي قلبتها نكد وميكانيزمات دفاع عن نفسهم متعددة ومختلفة وكلها لصالحهم هما.
يا ترى أسلوب قلب الترابيزة ده هما بيعملوه ليه ؟!
دي ناس عمرها ما بتواجه نفسها بأخطائها وبالتالي صعب تخليك أنت تواجههم بها.
عشان كده بيقلبوا الترابيزة في وشك.
غالباً قلب الترابيزة بيخليهم يكسبوا موقف من اتنين .
الموقف الأول:
إما انك تكون بطبعك إنسان متعاطف وطيب ومش بتاع مشاكل فيولد جواك شعور بالذنب أنك أنت ممكن فعلاً إللي تكون كبرت الموضوع وظلمته.او حساس وهو كان بيهزر وانت مفهمتش هزاره. فتعتذر بالرغم أنك مش غلطان أصلاً بالعكس ده أنت إللي مغلوط فيك.
الموقف التاني :
أنك تتعصب منه ومن أنه بجح وكمان بيقلب الترابيزة. ورد فعلك يكون انك تخرج عن شعورك وتغلط في كلامك معاه أو تغلط فيه هو شخصياً .هنا في اللحظة دي بيتحول من جاني لمجني عليه.ويعيش في دور الضحية. أوقات كتير يخليك أنت إللي تلف حوالين نفسك عشان تعتذر له على عصبيتك وغلطك.اللي كان أصلاً مجرد رد فعل على فعله إللي يكسف ويحرق الدم.
طب الحل إيه
من رأيي إن قابلت شخص استاذ في قلب الترابيزة .ابعد عنه وسيب له الترابيزة واللي عليها . روق دماغك وهدي أعصابك الحياة قصيرة متستاهلش انك تقضيها في فرهدة مع شخصيات سامة من النوع ده.
