اضطراب الشخصية النرجسية NPD
اضطراب الشخصية النرجسية NPD
كتبت/ د/ شيماء صبحي
الاضطراب ده منتشر أكتر عند الرجالة (حسب دراسات 2016)، وغالبًا بيتكشف بالصدفة… ليه؟
لإن المريض نفسه ما بيحسّش إنه غلطان أصلًا، شايف نفسه طبيعي جدًا، وما عندوش تعاطف مع حد، والأنا الأعلى عنده شبه مش موجود… مافيش ضمير يأنّبه، مهما عمل.
والمريض بالـNPD بيكون خطر على اللي حواليه، لإنه بياخد ثقته في نفسه من وجود ضحية، وبيختار الضحية بطريقة معينة هنشرحها.
صفاته الشخصية
عايش في وهم الكمال… شايف نفسه أحسن من كل الناس.
دايمًا عنده خيالات عن النجاح والعظمة.
بيستغل اللي حواليه لمصلحته.
متكبر ومتعالي في تصرفاته.
بيحب يكون مركز الاهتمام… همه كله إزاي يخطف الأنظار.
أي نقد بالنسبة له يعتبره إهانة كبيرة.
ثقته في نفسه جاية من إنه يأذي غيره… وده بيبان بوضوح في العلاقات العاطفية.
الكذب عنده نظام حياة… يكذب بدون سبب وبذكاء يخليك ما تعرفيش إنه بيكذب.
شكله دايمًا مهندم، جذاب، لبق، وناجح… وده جزء من الصورة اللي بيحب يقدّمها.
إزاي بيختار الضحية؟
عشان شايف نفسه فوق الكل، لازم الضحية تكون حد ناجح، قوي، بارز، ومنافس…
ليه؟
عشان يحسّ إنه كسب التحدي لما يكسّر الشخص ده نفسيًا.
وغالبًا مش بيكون عنده ضحية واحدة… بيكرر نفس الدورة مع كذا حد.
العلاقات العاطفية مع مريض الـNPD
اختيار الضحية عنده مش صدفة… ده قرار محسوب.
هو داخل العلاقة علشان يثبت لنفسه إنه “قيمة”… مش علشان يحب أو يبني علاقة.
ثقته بنفسه سطحية، ولو حد انتقده بتنهار الشخصية اللي بيقدمها.
العلاقة عنده 3 مراحل:
1️⃣ مرحلة الكمال
يبدأ يدي الضحية اهتمام كبير… يخليها تحس إنها أحسن واحدة في الكون.
يعظّم أبسط حاجة تعملها… ويكذب بذكاء عشان يعلّي قيمتها عند نفسها وتتعقّد فيه.
2️⃣ مرحلة التقليل
هنا يبدأ يهدم ثقة الضحية:
يضخم أي عيب بسيط فيها.
يتجاهل كل مميزاتها.
يخليها تحس إنها قليلة ومش كفاية.
والهدف الحقيقي؟
يسحب منافس قوي من ساحة حياته.
3️⃣ مرحلة التخلص
ببساطة… بيلاقي ضحية جديدة.
يهرب من الأولى بدون مبررات… فجأة.
والضحايا عادة ما تكتشف حقيقته بعد انتهاء العلاقة… لإن ده من أذكى الشخصيات في التلاعب.
الأطباء ينصحوا:
ابعدي فورًا عن مريض الـNPD… حفاظًا على نفسيتك وثقتك بنفسك.
الأسباب
لسه الأسباب مش مؤكدة، لكن أقرب التفسيرات:
عوامل وراثية.
تربية غلط… أهل بيفخّموا كل حاجة يعملها الطفل لحد ما يكبر بصورة وهمية عن نفسه.
خلل في المخ بيأثر على السلوك.
العلاج
العلاج المعرفي السلوكي (CBT) هو الأساس…
هدفه تعديل السلوكيات المؤذية اللي اكتسبها.
الفرق بين الشخص النرجسي ومريض الـNPD
الشخص النرجسي العادي: ممكن يرجع في كلامه… يعترف بغلطه… يحس بغيره.
مريض الـNPD: ما يعترفش بغلط… ما يتعاطفش… ما يشوفش غير نفسه.
